MUNISÍPIU, VIQUEQUE

SEAK lansa kampaña nasionál kulturál hodi hametin unidade iha Viqueque

SEAK lansa kampaña nasionál kulturál hodi hametin unidade iha Viqueque

SEAK realiza kampaña nasionál kultural hodi hametin unidade iha Viqueque. Imajen Tatoli/Vitorino Lopes da Costa.

VIQUEQUE, 28 maiu 2024 (TATOLI)-Sekretáriu Estadu Arte no Kultura (SEAK) liuhusi Diresaun Nasionál ba Promosaun Arte no Kultura (DNPAK), tersa ne’e, realiza kampaña nasionál kuturál hodi hametin unidade no fraternidade iha munisípiu Viqueque.

Tuir reprezenta Sekretáriu Estadu Arte no Kultura (SEAK), Gildo Santos Oliveira, esplika, kada tinan-tinan SEAK sempre lansa atividade kampaña nasionál kulturál iha kada munisípiu sira.

Iha tinan hirak liubá lansa ona iha  munisípiu Lautém, RAEOA, Liquiça no tinan ida-ne’e maka realiza iha munisípiu Viqueque ho tema prinsipál ba kampaña nasionál  ne’e “Kultura forte nasaun metin”.

“Nune’e, kampaña nasionál ne’e objetivu atu hametin kultura unidade no fraternidade ba Timor-oan sira. Tanba ita timor ne’e metin ho ita-nia kultura rasik  ne’ebé eziste iha ita-nia rain ida-ne’e. Kultura mak sai hanesan ai-hun boot ida ne’ebé nia sanak bá lorosa’e, soe ba loro monu  no rai klran. Ita konta ba mai ita  mai husi hun ida no abut ida de’it,” Gildo Santos Oliveira, hateten iha lansamentu kampaña kulturál, iha salaun Tilou, postu Viqueque Vila, ohin.

SEAK kria polítika kampaña nasionál ida-ne’e atu hametin eransa kulturál.

“Bainhira ita-nia kultura forte ona konserteza ita kria ona fraternidade, amizade no kria ona relasaun familiár ne’ebé sai metin hodi ita dezenvolve ita- nia rain doben Timor-Leste. Tan ne’e ho programa ne’e  nia alvu ba joven sira atu joven kreativu  hodi partisipa iha kualkér eventu ba dezenvolve nasaun ida-ne’e,” nia afirma.

Daudaun ne’e, SEAK hamutuk ho  Ministériu Juventude Desportu no Kultura (MJDK) promove lian-nain sira atu promove katuas sira liuhusi kobta istória kulturál ba jerasaun foun atu tradisaun ne’ebé rai iha ida-idak nian lisan labele lakon.

Kampaña ne’e hanesan eventu ka atividade kolókiu kona-bá kompartillamentu tradisaun no identidade hodi transmite matenek no anolójia tradisionál inklui lenda sira-ne’ebé eziste ba foin sa’e sira.

Aprezenta mós dansa tradisionál hodi promove nafatin identidade Timor-Leste nian liuliu aktu kreativa ne’ebé eziste iha munispiu Viqueque.

“Horsida iha kolókiu ne’e ita-nia lia na’in sira husi suku ida-idak sei transmite istória ba jerasuan foun sira liga ba rai ida-ne’e tanba ita ko’alia identidade rai iha naran rasik no  sentidu. Tanba ne’e tempu ona inan-aman sira konta istória ba oan sira”, nia esplika.

Iha fatin hanesan,  Sekretáriu munisípiu Viqueque asuntu sosiál no organizasaun, Acacio de Sousa, husu agradese ba ekipa SEAK ne’ebé mai realiza kampaña nasionál kuturál nian ba abitante sira iha munisípiu Viqueque  ho eventu sira-ne’e jerasaun foun sira bele kompriende identidade kultura sira.

“Ami autoridade lokál munisípiu ida-ne’e sente orgullu no agradese ba SEAK partilla informasaun kultura sira iha munisípiu Viqueque. Tanba kada postu ida iha rasik ninia kultura ne’ebé diferete hanesan Viqueque Vila, Lacluta, Ossu, Uatulari no Uatucarbau liuliu kultura lia mate no lia moris sira nomós tradisaun kada uma lisan sira-ne’ebé eziste iha munisípiu ida-ne’e”, nia agradese.

Iha kampaña nasionál ne’e hetan partisipa hosi lia na’in sira husi suku ida-idak, grupu dansa kulturál nomós hetan partisipa husi administradór postu lima, diretór munisipál, xefe suku, estudante sira iha postu Viqueque Vila, atividade kampaña kulturál ne’e hala’o durante loron ida.

Notísia relevante: SEAK-CNC konvida ema hotu partisipa iha eventu festivál kulturál

Jornalista   : Vitorino Lopes da Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!