HEADLINE, SAÚDE

HNGV rejista labarik na’in ualu mak problema renál

HNGV rejista labarik na’in ualu mak problema renál

Médiku Gustavo do Rosário da Cruz. Imajen Tatoli

DILI, 31 maiu 2024 (TATOLI) – Ospitál Nasionál Guido Valadares (HNGV) rejista pasiente problema renál hamutuk na’in ualu no hala’o hela tratamentu, Espesialista Nefrolojia, Gustavo do Rosário da Cruz, informa.

“Ita iha labarik ne’ebé mak hetan disfunsaun renál hodi halo tratamentu iha HNGV. Labarik iha na’in ualu,” Médiku Gustavo do Rosário da Cruz, ba Tatoli, liuhosi programa Entrevista eskluziva, iha Estúdiu TATOLI, iha Farol, ohin.

Nia esplika, labarik sira ne’e iha idade inferiór 17 hetan ne’ebé hetan problema renál, sira ne’e bele hetan liuhosi jénetika, maibé bele mós insektu ruma ne’ebé tata sira hodi kauza moras ne’e. Aleinde kauza hosi problema jénetika no tata hosi animál ka insektu, bele hetan infesaun ruma hahú moris mai ka ki’ik no hetan moras ruma ne’ebé hamosu problema renál sira.

Tuir espesialista ne’e, maioria pasiente ho disfunsaun renál mak ho idade hanesan 50 ba leten, tanba kauza mós hosi tensaun no raan-midar.

 Espesialista ne’e garante esperansa ba moris no sees husi problema renál mak hanesan disiplina ba hemu ai-moruk no kontrola problema renál atu evita ba iha fase raan. “Pasiente problema renál tenki hemu ai-moruk regularmente no konsulta ka kontrola rotina tuir rekomendasaun médiku”.

Neofrolojista Gustavo da Cruz sujere mós ba populasaun atu ba kontrola iha postu ka sentru saúde sira atu teste ba sira-nia raan no mi hodi hatene kona-ba infesaun hosi bakteria ruma hosi bee ka hahan.

Espesialista refere, labele dezenvolve ba ida-ne’e, ema sira ne’ebé hetan problema diabetika, tenki kuidadu moras ne’e.

Tensaun tenki kontrola hodi bele kontribui hamenus problema renál. Nune’e mós evita hahan toksiku husi loja sira hanesan frangu no bebida balun tanba lahatene kímiku sira iha laran ho durasaun tempu husi konservasaun hahan sira ne’e.

Nia esplika sinál sira ne’ebé aprezenta ba moras renál mak ain bubu matak, soe bee ki’ik furin, tenki ba iha ospitál atu halo tratamentu hodi prevene problema renál iha saúde ema nian.

Gustavu da Cruz sujere ba ema hotu labele konsome ai-moruk tradisionál barak, se hetan asidente viatura, inan isin rua raan fakar tenki hetan tratamentu lalais, servisu barak iha to’os ka natar tenki hemu bee barak, lakonsome bee ema hetan dehidrasaun.

Nia dehan, labele konsome ai-moruk tradisionál, tanba lahatene substánsia tóxiku ne’ebé ita hemu iha ai-moruk tradiosionál laran. Medikamentu ospitál iha nia dosis mg atu fó sira. Ai-moruk hemu sein reseita doutor ne’e fó impaktu ba renál. Kopu bo’ot loron ida kopu tolu no haat. Ita lahatene dosis bebeik bele provoka. Ita tenki prevene.

Atualmente HNGV rejista pasiente 102 pasiente ne’ebé fase raan ka hemodialize sura ho labarik na’in ualu.

Nefrologista informa ema timoroan na’in tolu mak hetan transplantasaun renál ba iha Indonézia, Filipina no Inglaterra.

Jornalista: Jesuína Xavier

Editór: Cancio Ximenes

iklan
iklan

Leave a Reply

iklan
error: Content is protected !!