Top

Tailándia apoia fundu hadi’a kapasidade no empodera ekonomia feto TL

eeg

DILI, 31 maiu 2024 (TATOLI)—Governu Tailándia liuhusi Embaixadór Tailándia iha Timor-Leste apoia osan ho montante$ 2,700 USD bá Fundasaun Alola hodi ajuda hadi’a kapasidade no programa empoderamentu ekonomia ba feto Timor-Leste (TL).

“Ami-nia komitmentu mak atu haforsa seguransa umana no hakbi’it feto no labarik sira iha Timor-Leste, foka liubá aumenta sira-nia saúde, edukasaun, no oportunidade ekonomia,” Embaixadór Tailándia iha TL, Atipat Rojanapaibulya, informa iha Edifísiu  Embaixada Tailándia Farol, Dili, ohin.

Embaixadór Tailandés ne’e dehan, Governu Tailándia liuhosi nia embaixada, komesa ajuda Fundasaun Alola hahú husi tinan-2012, ne’ebé foka liubá  saúde inan no oan sira, sai hanesan tema sentrál ba kooperasaun entre Tailándia ho Timor- Leste ba tinan ida-ne’e.

Liuhosi inisiativa lubuk ida aborda aspetu materiál no rekursu umanu inklui modernizasaun fatin rua Sentru Báziku bá Emerjénsia Obstétrika no Kuidadu Neonatál (BEMONC) iha Quelicai ho Baguia no kooperasaun atu haforsa edukasaun obstétrika iha eskola obstétrika tolu iha Timor-Leste, nune’e mós investigasaun konjunta kona-ba nados-mortos ho Universidade Mahidol husi Tailándia no mós ho UNFPA Timor-Leste. Maske uituan maibé komunidade Tailándia iha Dili iha partisipasaun ativu tebe-tebes iha atividade voluntáriu oi-oin ho intensaun atu hakbi’it feto no komunidade vulneravel sira seluk iha Timor-Leste.

“Entrega apoiu fundu ne’e marka okaziaun auspisioza ba aniversáriu Sua Majestade Liurai Feto Suthida Bajrasudhabimalalakshana, iha loron-3 fulan-juñu 2024. Sua Majestade Liurai Feto hanesan defensora firme ba empoderamentu feto no protesaun ba labarik sira, entaun ho kolaborasaun ida-ne’e hatudu kompromísiu Sua Majestade atu hasa’e vida feto no labarik sira nian,” nia relata.

Iha fatin hanesan, Diretora Ezekutiva Fundasaun Alola, Maria Imaculada Guterres agradese Tailándia tanba apoiu ne’ebé oferse hodi fó kapasitasaun ba grupu arte atu aumenta kualidade produsaun no diversifikasaun produtu no mós atu hakbi’it grupu hodi asesu ba merkadu liuhusi Alola Natál no Feira tinan klaran.

“Ami apresia no agradese ba kontinuidade apoiu husi Embaixada Real Tailándia,  ba ami  ne’ebé fó kapasidade ba grupu arte atu aumenta kualidade produsaun no diversifikasaun produtu no mós atu hakbi’it grupu ne’e hodi asesu ba merkadu liuhusi Alola Natál no Feira tinan klaran. Ho nune’e, grupu bele hetan osan hodi suporta sira-nia família nia nesesidade,” Maria Imaculada Guterres afirma.

Entertantu, Fundasaun Alola funda hosi Kirsty, Sword Gusmão, nu’udar naun-profit, organizaun naun-governamentál implementa programa oi-oin iha área edukasaun, saúde, advokasia no dezenvolvimentu ekonómiku atu hadi’a vida feto ho labarik sira iha Timor-Leste.

Jornalista : Felicidade Ximenes

Editór: Rafael Ximenes de A. Belo

Publisidade

Leave a Reply

Latest Post

error: Content is protected !!