EKONOMIA, BOBONARO, HEADLINE, MUNISÍPIU

Governu presiza intervein abitante ne’ebé harii uma iha natar Maliana

Governu presiza intervein abitante ne’ebé harii uma iha natar Maliana

Komunidade sira fakar ona rai-henek no fatuk iha natar área Soso, suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 06 Juñu 2024 (TATOLI) –  Governu presiza halo intervensaun ba abitante sira-ne’ebé harii uma iha natar postu administrativu Maliana, munisípiu Bobonaro.

Agustino dos Santos Mouzinho nu’udar joven hosi Lahomea, husu ba autoridade munisipál no Governu Sentrál atu halo intervensaun ruma ba komunidade ne’ebé konstrui uma iha natar laran sira-ne’ebé pertense ba postu administrativu Maliana, munisípiu Bobonaro.

Mouzinho subliña, durante ne’e observa komunidade barak liuliu iha parte Soso kontinua haluan espasu rai produtivu sira hodi fakar fatuk no rai-henek atu konstrui uma no halo konstrusaun boot sira-ne’ebé tuir nia ba futuru bele fó ameasa produsaun hare menus.

Notísia relevante: Governu orienta DSMA kontrola komunidade halo uma iha natar Maliana

“Iha ita-nia territóriu Timor-Leste, espesialmente munisípiu Bobonaro ne’e produsaun ba hare ne’e boot tebes. Ha’u hanoin ba futuru ita nafatin nia foos sei lakon, ita sei kontinua sosa foos iha estranjeiru,” nia informa ba jornalista sira iha Maliana, kinta ne’e.

Ba kestaun ne’e, Administradór postu administrativu Maliana, Augusto Caetano, fó ona orientasaun ba xefe suku na’in-hitu, atu labele asina deklarasaun komunidade ne’ebé fa’an rai-produtivu sira ba empreza lokál no nasionál atu halo konstrusaun boot iha natar laran.

“Ida-ne’e obrigatóriu, se sira halo negosiasaun kulturál mas ami autoridade postu, xefe suku no xefe aldeia sei la asina karta ne’e fa’an rai, tanba se mak fa’an rai natar fatin signifika fa’an nia bikan ka fa’an nia kabun,” nia tenik.

Xefe suku Odomau, Cirilo Moniz Sirio Berre, konkorda ho orientasaun serbisu hosi administradór postu Maliana, tanba ba futuru sei fó impaktu negativu.

Tuir nia, atu regulariza aktu hirak-ne’e, governu presiza prodús lei espesífiku nune’e bele bandu sidadaun hotu-hotu labele utiliza rai natar halo fali uma.

“Ida-ne’e sai ami-nia preokupasaun, sé lei ne’e mak laiha, neineik ba neineik haree ba nesesidade ita-nia ema sira, entaun sei fó leet atu okupa área produtivu sira pertense ba setór agrikultura nia,” nia afirma.

Notísia relevante: Lú Olo triste haree natar Maliana nakonu ho fatuk no rai-henek

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!