iklan

EKONOMIA, HEADLINE

CLN fasilita foos ho presu kiik ba ema vulneravel iha Lautem no Baucau

CLN fasilita foos ho presu kiik ba ema vulneravel iha Lautem no Baucau

Imajen Tatoli/Francisco Sony

DILI, 13 juñu 2024 (TATOLI) – Ministériu Komérsiu no Indústria liuhosi Sentru Lojístika Nasionál (CLN), mantein fasilita foos ho marka MKAE ho presu razoavel ba ema vulneravel sira iha Munisípiu Lautem no Baucau.

“Hafoin ita halo intervensaun ba merkadu ho foos marka MKAE  iha RAEOA, depois kontinua ba Atauro no foin lalais iha Ermera, agora ita atu kontinua ba Buacau no Lautem tanba ekipa ohin halo koordenasaun hamutuk hodi halo intervensaun ida-ne’e”, Prezidente Sentru Lojístika Nasionál CLN), Antonio de Araujo Soares ba TATOLI iha Timor Plaza, ohin.

Nia dehan, intervensaun ne’e laos ba ema hotu atu hetan maibé ida-ne’e haree ba povu kbiit laek ne’ebé mak forsa la to’o atu sosa foos ho folin aas, tanba proposta sira ne’e mai hosi Prezidente Autoridade Munisípiu no administradór, xefe suku mak rekolla sira-nia komunidade vulneravel  sira.

“Tarjetu ne’e ba sidadaun sira ne’ebé mak vuneravel liu, tanba ne’e mak ita labele atende ema  hothotu atu hetan intervensaun ida-ne’e,”nia esplika.

Nia esplika, kada munisípiu Governu halo intervensaun nafatin ho foos tonelada 50, hosi ne’e foos importasaun 25 tonelada no produtu lokál ho foos rai 25 tonelada, entaun ida-ne’e mak durante ne’e Governu halo. Agora ba fila fali Lautem ho Baucau nafatin ho foos 50 tonelada depende ba sira-nia autoridade munisípiu submete dadus mai liuliu ba vuneravel sira.

Sentru Lojístika Nasionál nafatin sosa foos rai husi munisípiu sira hodi faan ba komunidade ho folin barratu hodi fasilita komunidade vulneravel sira-nia moris.

“Iha tinan ne’e, ami nafatin sosa produtu foos rai iha munisípiu sira hanesan Manatutu, Baucau, Viqueque, Bobonaro, Covalima no RAOEA, nune’e faan fila fali ba komunidade kbiit laek sira iha área rurál hodi hakmaan sira-nia sofrimentu iha tempu balun”, nia relata.

Iha fatin hanesan, Diretora Regulasaun Komérsiu iha MCI, Manuela da Silva Tilman, hateten antes ne’e Governu halo ona intervensaun merkadu iha RAOEA, Atauro no Ermera no tuir planu sei kontinua ba Munisípiu Lautem no Baucau.

“Iha semana kotuk ami ho CLN faan ona foos subsídiu ho folin baratu ba komunidade kbiit laek  sira iha área rurál hodi fasilita sira hodi sosa ba konsumu nesesidade loroloron nian”, Manuela konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!