iklan

INTERNASIONÁL, DILI, HEADLINE

Governu oferese antigu edifisiu CPLP ba Angola hodi harii Embaixada

Governu oferese antigu edifisiu CPLP ba Angola hodi harii Embaixada

Ministru MNEC Bendito Freitas. Imajen Tatoli/Antonio Daciparu

DILI, 13 juñu 2024 (TATOLI)– Ministru Negósiu Estranjeiru no Kooperasaun (MNEK), Bendito Freitas, informa Governu deside ona hodi oferese antigu edifisiu CPLP iha tasi ibun-Kampu Alor-Dili, ba nasaun Angola atu halo nia-Embaxada iha Timor-Leste.

“Ita koordena di’ak tebes ho Sekretaria Estadu Terras Propriedade, nune’e Angola ita fó ona fatin uluk edifisiu CPLP nian, entaun sei halo fali re-abilitasaun, nune’e sira bele utiliza ba sira nia Embaixada,” Ministru Bendito hateten ba jornalista sira iha edifisiu MNEK Dili, kinta ne’e.

Notisia relevante:Governu kontinua esforsu buka rai fó ba nasaun amigu sira harii Embaixada

Daudaun ne’e, Embaixadór Angola no Singapura ho sira nia ekipa iha ona Timor-Leste no komesa hala’o ona servisu diplomata nian hodi hein Governu oferese fatin lolos ba sira.

Governu mós esforsu hela buka fatin ne’ebé di’ak ba nasaun amigu Inglaterra no India atu harii sira nia Embaixada tanba konfirmadu ona tempu besik nasaun rua ne’e mós hakarak estabelese Embaixada iha Timor-Leste.

“Singapura nian ita sei haree, ita sei koordena nafatin ho Ministeriu Justisa oinsa buka fatin tanba sira hakarak fatin ne’ebé di’ak,” Ministru ne’e tenik.

Governu mós haree hela edifisiu sira iha resintu Pateo Colmera-Dili atu taransforma sai Bairru Diplomata.

“Agora ita haree hela situasaun infrastrutura rai laran nian, Prezidente Repúblika atu kria Bairru Diplomata, nune’e ita haree ona edifisiu ne’ebé PATEO halo hela ne’e posibilidade ba futuru Governu bele aluga ou bele mós sosa kotu husi Pateo, nune’e bele sai hanesan rezidensia ba misaun estranjeiru sira bele sai ona hanesan Bairru Diplomata, bele hatama ona rendimentu mai ita,” Ministru Bendito katak ba jornalista sira iha Palásiu Prezidensiál Dili, kuarta ne’e.

Notisia relevante:PR Horta propoin Governu kria bairru diplomata

Jornalista: Hortencio Sanchez

Editór    : Florencio Miranda Ximenes

iklan
iklan

Leave a Reply

iklan
error: Content is protected !!