Pertamina fornese urjente kombustível ba sentrál elétrika Inur Sakato
OÉ-CUSSE, 18 juñu 2024 (TATOLI) – Empreza Pertamina Internationál Timor SA, tersa ne’e fornese urjente kombustível kilolitru 850 ba sentrál elétrika Inur Sakato, Rejiaun Administrativa Espesiál Oé-Cusse Ambeno (RAEOA).
Notísia relevante: Kombustível bá sentrál elétrika Sakato sei hotu iha fevereiru
Hafoin to’o Oé-Cusse, José Bonifacio Pinto, nu’udar supervizor Pertamina Internasionál Timor SA, ba jornalista sira, katak, kombustível kilolitru 850 ne’e komposta husi gazoel ka solar kilo litru 750 liuhusi transporte marítima no 100 liuhusi terrestre.
“Ami mai ne’e urjente de’it, bazea pedidu husi RAEOA, sira husu kilolitru 850, ne’e espesiál ba sentrál Inur Sakato de’it,” José Bonifacio Pinto, ko’alia iha sentrál Elétrika Inur Sakato, lokaliza iha suku Nípani, sub-rejiaun Pante Makasar.
Nia informa, kombustível kilolitru 850 ne’e, nia durasaun la to’o fulan tolu, sekuandu kilolitru 1.200 durasaun bele to’o fulan tolu, tanba utilizasaun iha Oé-Cusse barak.
“Uluk sei kilolitru rihun 11 agora sa’e rihun 15, entaun loron ida bele uza rihun tonelada 16 ba kombustivél iha Oé-Cusse,” nia katak.
Notísia relevante:Autoridade estende kontratu empreza hodi fornese kombustível ba sentrál elétrika Sakato
Xefe Departamentu EDTL Oé-Cusse, Antão Cabal, apoia urjenti ne’e tanba kombustível ne’e estoke husi extensaun kontratu tinan kotuk nian, no daudaun ne’e garantia katak, sentrál elétrika Inur Sakato sei bele halo operasaun ba fulan rua tán.
“Ami sei esforsa atu halo tenderizasaun ba futuru depois estoke restu ne’ebé ita utíliza, ita bele kontrata kompañia foun hodi fornese kombustível ba sentrál, tanba 850 ne’esei atende ba fulan rua ho balun de’it, antes fulan rua atu hotu, kompañia foun tenke iha kontratu atubele distribui kombustível mai sentrál elétrika Oé-Cusse,” nia promete.
Rekorda fali katak, antes ne’e kontratu empreza Pertamina Internastionál atu fornese kombustível ba sentrál elétrika Inur Sakato termina ona iha loron 28 fevereiru 2024 ne’e, maibé Prezidente Autoridade RAEOA, Rogério Tiago Lobato, extende tan ba fulan tolu hodi hein prosesu konkursu públiku foun.
Notísia relevante: EDTL Nasionál observa sentrál elétrika Inur Sakato Oé-Cusse
Jornalista: Abílio Elo Nini
Editór: Evaristo Soares Martins
