iklan

BOBONARO, HEADLINE, MUNISÍPIU, SAÚDE

Prezidente Repúblika inaugura postu saúde suku Kolimau

Prezidente Repúblika inaugura postu saúde suku Kolimau

Prezidente Repúblika, José Manuel Ramos Horta, inaugura postu saúde suku Kolimau, postu administrativu Bobonaro, munisípiu Bobonaro. Imajen Tatoli/Sérgio da Cruz

BOBONARO, 25 juñu 2024 (TATOLI)-Prezidente Repúblika (PR), José Manuel Ramos Horta, hamutuk ho Ministériu Saúde, tersa ne’e inaugura postu saúde no rezidénsia pesoál saúde iha suku Kolimau, postu administrativu Bobonaro, munisípiu Bobonaro.

Xefe Estadu konsidera estabelesimentu infraestrutura saúde foun ne’e hanesan sorte ida di’ak ba komunidade Kolimau, tanba iha fatin barak sei halerik ba setór saúde liuliu kondisaun ba pesoál saúde sira.

Prezidente Repúblika husu Ministériu Saúde atu kontinua koloka médiku no pesoál saúde sira hodi fó atendimentu saúde ne’ebé di’ak ba pasiente ne’ebé sira-ne’ebé moras.

Xefe Estadu apela mós ba pesoál saúde sira atu presta atendimentu ho fuan no domin ba komunidade suku Kolimau.

Notísia relevante: Saúde Bobonaro sei fahe pakote ijéniku ba komunidade ne’ebé simu vasina

“Ida-ne’e hanesan modelu ida-ne’ebé ita bele mehi atu halo klínika, sentru saúde iha suku sira ho kondisaun infraestrutura ho rezidénsia doutór sira, tuir orsamentu moderadu tebes ho edifísiu kualidade tebes, agora ita haree kapaas loos, maibé ita koko took fulan neen mai, labele falta medikamentu,” Xfe Estadu hateten.

Biban ne’e, Prezidente Autoridade Munisípiu Bobonaro, Alexandrino Pires, hateten autiridade munisipál halo esforsu oioin hodi finaliza obra ne’e, atubele fó asisténsia saúde ba komunidade sira-ne’ebé moras.

“Ami-nia kbiit mak halo ona postu saúde, maibé ami laiha kbi’it atu tau pesoál saúde sira, inan-aman sira barak iha presiza tratamentu saúde, ne’ebé ami husu ba Ministériu Saúde, iha tempu badak nia laran tau-netik pesoál saúde, hodi halo atendimentu saúde ba komunidade,” nia fó hanoin.

Xefe suku Kolimau, Teotónio de Carvalho Marques, kontente no agradese ba Governu tanba durante tinan barak ona komunidade sira halerik ba setór saúde.

“Kondisaun agora di’ak, sentru saúde iha ona, tratamentu besik ona, tanba ita hotu-hotu hatene katak uluk ba araska tebes, liuliu ita-nia inan feton sira ne’ebé maka isin-rua, kuandu atu partu karik sei lori ba do’ok, maibé agradese ba governu tanba hari ona sentru ida ne’e hodi halo atendimentun ba suku Kolimau, Mali-Ubu no Ermera sorin tan, hanesan Atara, Lasaun, Obulo, bele mai hotu iha-ne’e,” nia katak.

Diretor Jerál Ambulánsia Emerjénsia Médika husi Ministériu Saúde, Simplicio Amarál, promete iha tempu badak sei koordena ho Diresaun Servisu Munisipál Saúde Bobonaro atu koloka tán pesoál saúde ba infraestrutura foun ne’e.

“Sira mai ne’e mak hanesan médiku, parteira, enfermeiru no tékniku aliadu sira, tanba ne’e primeira faze rekrutamentu ba funsionáriu ita halo ona, segunda faze ita sei realiza iha tempu, hodi koloka pesoál saúde tanba ita-nia edifísiu iha ona,” nia akresenta.

Enkuantu obra ne’e gasta orsamentu rihun $200-resin husi projetu Planu Integradu Dezenvolvimentu Munisipál.

Postu saúde ne’e sei halo atendimentu kobre komunidade sira-ne’ebé pertense ba komplex Hauba inklui komunidade balu iha postu administrativu Atsabe, munisípiu Ermera.

Notísia relevante: APC-DNPKK realiza kampaña promove dame iha Bobonaro
Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!