BOBONARO, 24 juñu 2024 (TATOLI) – Tuir dadus husi Programa Nasionál Dezenvolvimentu Suku (PNDS) Munisípiu Bobonaro hatudu progresu fíziku konstrusaun Uma Naroman ba Povu (UNP) regulár faze daruak tinan 2022 atinje ona 95% husi totál uma unidade 459.
Diretor PNDS Munisípiu Bobonaro, Rosário Mali, konfirma projetu barak mak kuaze konklui no entrega ona ba benefisiáriu sira, falta de’it balu mak sei implementa hela ne’ebé daudaun ne’e to’o ona faze finalizasaun.
Notísia relevante: UNP faze daruak 36 iha Bobonaro-Cailaco seidauk hahú
“Ninia persentajen ne’e to’o ona 95%, ne’e ita foti rata-rata, hela de’it 5% mak seidauk finaliza tanba labele asesu estrada,” nia informa ba Jornalista sira iha Maliana, segunda ne’e.
Nia rekoñese durante ne’e projetu balu husi suku sira iha área rurál paradu razaun tanba kondisaun estrada mak labele asesu hanesan; Molop, postu administrativu Bobonaro, Cailaco, Atabae no postu administrativu Lolotoe.
Diretór ne’e hatutan, to’o agora fornesedór sira labele mobiliza materiál fabrikadu no lokál ba postu administrativu Lolotoe paradu, tanba estrada iha área Zulo-Il, suku Lontas hetan estragu totál inklui estrada seluk kotu, hafoin akontese udan-boot foin lalais ne’e.
“Ami-nia funsionariu iha-ne’ebá informa fali mai dehan katak di’akliu agora labele sae ba, tanba agora komesa udan fali ona, entaun labele asesu ba Lolotoe, mobilizasaun matérial ba ladi’ak, Lolotoe ba suku tolu Gildapil, Lebos, Lontas, ita bele asesu ba materiál fabrikadu, maibé ba materiál lokál labele, tanba nia atu foti rai-henek liu fali husi dalan kotu ne’e, depois suku haat seluk ne’e materiál fabrikadu ita labele lori ba,” nia katak.
Diretór Rosário Mali nsubliña, PNDS laiha meiu seluk atu rezolve problema ne’e, tanba ne’e hein parte kompetente normaliza estrada mak foin bele mobiliza materiál ba Loloto’e.
“Iha-ne’ebá ita atu halo milagre ka, ami hein IGEADI,I.P normaliza tiha estrada, foin ami lori materiál ba hodi finaliza, tanba ita-nia benefisiáriu ba uma ne’e mós durante tinan barak ona hein sira-nia uma ne’e,” nia katak.
Enkuantu projetu UNP regulár ne’e iha unisípiu Bobonaro implementa iha suku 50 ne’ebé kada suku hetan uma unidade sia.
Notísia relevante: Projetu UNP iha Oe-eleu hahú hikas konstrusaun
Jornalista: Sérgio da Cruz
Editór: Evaristo Soares Martins
