IGEADI loke dalan makleet iha Zulo-Il Lolotoe
BOBONARO,04 jullu 2024 (TATOLI) – Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI,IP, sigla portugés) Brigada Maria-Tapo, daudaun ne’e halo ona intervensaun hodi loke dalan makleet ka temporáriu hodi fasilita movimentasaun públiku iha área Zulo-Il, suku Lontas, postu administrativu Lolotoe, munisípiu Bobonaro.
Institutu Jestaun Ekipamentu Apoia Dezenvolvimentu Infraestrutura loke dalan makleet tanba dalan referida hetan estragu husi erozaun hafoin akontese udan-boot iha fulan hirak liubá.
Prezidente Konsellu Administrasaun IGEADI,IP, Anapula da Cruz, hateten intervensaun ne’e atu fasilita movimentasaun transporte públiku no privada husi diresaun Lolotoe Vila ba postu administrativu Boboanaro no Maliana Vila.
Notísia relevante: Movimentasaun karreta-motorizada iha estrada Zulo-il Lolotoe paradu
“Ita halo ona servisu iha terrenu atu provizóriu karreta bele liu, maibé ita haree ba kondisaun udan, ita kuandu loke estrada foun estrada tenke maran, sé bokon haneansa ne’ebá mákina hamriik lametin, rai namdoras no rai naruk,” nia ko’alia iha Jináziu Maliana, kinta ne’e.
Responsável IGEADI,IP ne’e hateten, ba futuru sei loke mós dalan alternativu, tanba tinan-tinan governu gasta osan halo normalizasaun, la kleur de’it udan monu-rai estragu fila-fali.
“Maibé ami esforsu nafatin atu ita-nia populasaun ne’ebé mak iha Lolotoe labele sai izoladu,” nia katak.
Ministru Obra Públika, Samuel Marçal, haree direita ona tanba ne’e iha tempu badak sei orienta espesialista ida mak halo estudu kona-ba estrutura rai iha área Zulo-Il, hafoin loke dalan alternativu, tanba fatin ne’e tinan-tinan sempre akontese rai-halai.
“Tanba rai ne’e la’ós rai normál, rai manu-teen dodok, ne’ebé halai hela de’it, ita tenke haree didi’ak, maizmenus ita tenke dezeña halo didi’ak, iha métodu saida mak ita atu implementa, selae udan oituan mai monu fali, ita harii ne’e kustu ne’e boot, parese ke millaun ida ba leten, entaun tenke hare didi’ak,” nia hateten.
Tuir dadus postu administrativu Lolotoe iha aldeia 20, suku hitu ho totál populasaun 7,695 no xefe família 3,813.
Notísia relevante: PAM Bobonaro nota presiza intervensaun urjénsia ba estrada Zulo-il Lolotoe
Jornalista : Sérgio da Cruz
Editór : Evaristo Soares Martins
