MAE avalia progresu ezekusaun orsamentu munisipál
DILI, 15 jullu 2024 (TATOLI)–Ministru Administrasaun Estatál (MAE), Tomás do Rosário Cabral, hateten Governu ho Autoridade Munisipál sira hala’o avaliasaun ba progresu ezekusaun orsamentu kada munisipiu ho tema “Progresu Kapitál Dezenvolvimentu”, atu haree ba iha ezekusuan orsamentu 2024 nian.
Notísia Relevante: PN aprova proposta-lei OJE 2024 iha finál globál ho votu a-favór 41
“Ita hotu hatene katak autoridade munisipál iha poder administrativu no finanseiru. Sira-nia ezekusuan la mai ona Governu sentrál, sira-nia ezekusaun diretamente ba sistema Banku Sentrál no Ministériu Finansa. Iha informasaun katak munisipiu sira iha ezekusaun liu 50%, maibé relatóriu Ministériu Finansa menus husi ne’e,” Ministru Administrasaun Estatal (MAE), Tomás do Rosário Cabral, ba jornalista sira iha Bebora.
Tomás do Rosário Cabral esplika, osan ne’ebé fó ba sira hamutuk rihun $500 atu atende ba iha agrikultura,sentru saúde, bee-moos no eskola.
Eskola sira-ne’e atu haree ba iha merenda eskolár iha munisipiu hotu, tanba ne’e mak sira-nia orsamentu ketak no sira tenke responde kondisaun sira-ne’e, atu haree refetóriu ba labarik estudante sira.
Ministru ne’e esplika, munisípiu sira iha poder finanseiru no lokál, poder polítiku iha Governu sentrál entaun sira mós tenke servisu makaas no Governu sentrál fó kompeténsia atu rezolve problema munisipiu sira-nian.
“Sira tenke iha papel ida tanba sira mak reprezenta Governu sentrál. Servisu hamutuk ho Governu iha pontu prinsipál 10-resin mak hanesan saúde, edukasaun, agrikultura ne’ebé sai ona responsabilidade sira-nian, tanba ne’e mak iha enkontru ne’e atu halo reajustamentu ba programa sira-ne’e.
Governante ne’e hateten, orsamentu ba munisipiu sira-ne’e kiik tanba boot ne’e millaun $1, entaun iha enkontru ne’e mós atu halo reajustamentu ba ida-ne’e no osan tenke tuir sira-nia kondisaun.
Iha fatin hanesan, Prezidente Autoridade Munisipiu (PAM) Viqueque, Francisco Cruz Simões Soares, hateten munisípiu Viqueque ezekuta ona Orsamentu Jerál Estadu (OJE) hamutuk 32%.
“Ita iha totál orsamentu millaun $2. Ita ezekuta ona 32% iha saláriu no vensimentu, projetu sira iha área infraestrutura iha munisipiu,” nia hateten.
Notísia Relevante: PN aprova proposta OJE 2024 MAE millaun $54,4 iha espesialidade
Jornalista : Jesuína Xavier
Editór : Cancio Ximenes
