AINARO, 16 jullu 2024 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes, hateten sei apoia komputadór ba Rádiu Komunidade Lian Tatamailau Ainaro no media online Lian Orluli atu fasilita jornalista sira halo servisu ho di’ak liután.
“Ohin vizita rádiu komunidade Lian Tatamlau Ainaro hodi haree besik atividade ne’ebé ke durante ne’e rádiu ne’e halo no atu hatene sá dezafiu no difikuldade sira mak rádiu ne’e enfrenta. Realidade rádiu funsiona di’ak, sira halo atividade transmisaun, sira-nia espasu ne’ebé sira uza hodi halo servisu loroloron mós di’ak, maibé ha’u haree komputadór mak laiha ho nune’e ha’u fila ba Dili, sei ba koalia ho diretór jerál atu apoia komputadór balun mai iha ne’e hodi jornalista bele uza atu halo servisu”, Expedito hateten ba jornalista sira hafoin halo vizita Rádiu Komunidade Lian Tatamailau Ainaro no media online Lian Orluli, tersa, ohin.
Nia dehan, komunidade Lian Tatamailau iha komputadór ida de’it, dala ruma jornalista sira uza lisuk ida-ne’e hodi halo servisu no kuandu besik oras atu halo tansmisaun, jornalista tenke hakerek surat tahan hodi ba lee.
“Tanba ne’e ohin ha’u husu ba jestora rádiu ne’e katak osan subvensaun públika ne’ebé SEKOMS atribui ba rádiu komunidade sira foin daudaun ne’e no sira (rádiu lian Tatamailau) mós hetan ho montante $5.065 para nia jestora bele haree jere oinsá para hola komputadór ida ka rua hodi sira bele uza, maibé nia dehan osan subvensaun ne’e mai kedan ho nia item tanba ne’e labele muda no ha’u sei buka dalan hodi apoiu sira”, nia adianta.
Governante ne’e husu ba rádiu komunidade lian Tatamailau atu fó prioridade liu ba kobertura asuntu sosiál.
“Ha’u husu mak ne’e, iha atividade kobertura rádiu komunidade sira tenke fó importánsia mak ba atividade sosiál 60% no kobertura ba ajenda sira, imi bele redús ba 40%, atu nune’e bele esplora potensialidade sira iha munisípiu para komunidade sira bele sente katak rádiu komunidade ne’e husi duni komunidade”, nia afirma.
Nia husu atu iha atividade tolk show ne’ebé hala’o hodi bele konvida komunidade sira ne’ebé iha kreatividade ne’ebé prodús ona buat balun iha nia suku, liuliu iha pekuaria nia atu nune’e bele enkoraja komunidade sira seluk bele ativu liután.
Iha biban ne’e, SEKOMS Expedito mós halo vizita ba media online Lian Orluli, hodi haree besik kondisaun servisu media online.
“Ha’u apresia tanba iha feto jornalista kria rasik nia media ne’ebé hetan rejistu iha Konsellu Impreza hodi halo atividade jornalizmu tanba ne’e mak ha’u mós sei haree hodi bele apoia media ne’e halo servisu ba oin ho di’ak”, nia dehan.
Iha fatin hanesan, Jestora rádiu komunidade lian Tatamailau, Rita Barros, agradese ba prezensa SEKOMS Expedito mai vizita rádiu komunidade Tatamailau.
‘’Ha’u atu hato’o agradesimentu ba eselénsia Sekretáriu Estadu Komunikasaun tanba bele vizita ona mai ami nia rádiu”, nia agradese.
Nia dehan, durante ne’e rádiu komunidade Tatamailau halo nia atividade kobertura ne’ebé to’o iha área rurál sira, maibé iha difikuldade mak menus komputadór.
“Tanba iha ne’e iha komputadór ida de’it, sira labele uza hotu, entaun jornalista sira iha ne’e bainhira atu hakerek notísia sira tenke hakerek de’it iha surat tahan mutin mak sira ba lee de’it, ida-ne’e mak ami nia difikudade”, nia hateten.
Nia hateten, rádiu komunidade Lian Tatamailau asesu mós ba osan subvensaun públika ne’ebé atribui husi SEKOMS mai kedan ho nia item no labele uza ba item seluk.
“Maibé eselénsia hateten ona no sei fó apoiu ba ami komputadór para ami-nia jornalista sira ne’e bele uza hodi halo servisu”, nia afirma.
Rita hateten, notisia sira ne’ebé mak transmite iha rádiu komunidade Lian Tatamailau ne’e barak liu ba asuntu sosiál no ba talk show ne’e sempre konvida joven kreativu sira.
Rádiu komunidade Lian Tatamailau iha jornalista permanente na’in-neen, iha komputadór ida no motór rua.
Nune’e mós, Jestora media online Lian Orluli Clementina Fátima, hateten media online Lian Orluli lao tuir kapasidade maibé ida-ne’e la hamate vontade jornalista atu transmite informasaun ba públiku.
“Ami iha media foun ne’ebé foin moris iha tinan rua liu ba, ami-nia jornalista iha ne’e na’in-neen, durante ami halo kobertura to’o iha baze, ami hetan difikuldade maibé ba divulgasaun informasaun ami kontinua transmite ba públiku”, nia afirma.
Nia dehan, difikuldade ne’ebé media Lian Orluli iha mak menus komputadór.
“Ami iha komputadór haat, tolu aat no ida mak funsiona no ohin iha vizita ne’e, ami agradese tebes ba eselénsia SEKOMS tanba nia hakarak apoia mós ami”, nia konklui.
Jornalista: Natalino Costa
Editór : Zezito Silva
