DILI, 20 jullu 2024 (TATOLI) – Ekipa Timor-Leste U-19 la konsege enfrenta nia adversáriu U-19 Filipina iha jogu Asian Football Federation (AFF) ne’ebé realiza iha Estádiu Gelora Bung Tomo Surabaya sábadu lorokraik ne’e, iha ne’ebé Timor-Leste tenke sofre golu rua 0-2.
Bainhira jogu la’o ekipa U-19 Filipina nian hasoru kedan ho atake ne’ebé másimu. Sira fó kedas presaun ba liña defeza Timor-Leste U-19 hodi hetan vantajen iha inísiu jogu.
Rezultadu ne’e midar, Selesaun Nasionál Filipina ikus mai konsege marka golu liuhusi Abang Banatao iha minutu 12. Golu ne’e halo Timor-Leste U-19 responde ho atake maka’as ba Filipina nia defeza maibé atake hirak ne’e hela de’it hanesan atake.
Mezmu nune’e, esforsu husi Timor-Leste hetan antisipasaun di’ak husi jogadór sira ikusmai, primeira parte ramata Filipina mak provizóriu lidera jogu ho skoru 1-0.
Tama ba segunda parte, Selesaun Nasionál Timor-Leste joga ho atake lalais dezde inísiu jogu. Berdila Da Silva no Da Costa sai hanesan motor atake prinsipál ba ekipa ne’ebé halo husi Eduardo Pereira.
Maibé atake hotu Timor-Leste nian hela de’it hanesan atake tanba la responde golu ruma hodi halo empata jogu ne’e. Maibé ekipa Lafaek nunka lakon oportunidade, jogadór sira lori Timor-Leste nakfilak ba ameasa liuhusi oportunidade ne’ebe kria husi Alexandro Bakhito nia suta ne’ebe dudu liuhusi guarda-rede Filipina, Inigo Castro.
Filipina hatudu jogu bonitu, kontinua halo presaun ba Guarda-rede Timor-Leste ho velosidade ne’ebé maka’as, maibé sutu perigu balun Guarda-rede ne’e konsege salva.
Tama ba segunda parte, Timor-Leste hola inisiativa hodi ataka uluk, maibé Filipina mak kria oportunidade liuhusi suta Angelo Arnado Menisca nian, maibé nafatin iha sorin, la kona iha alvu.
Timor-Leste nakfilak sai ameasa liuhusi suta ida ne’ebé lansa husi Alexandre Guterres ne’ebé sei iha sorin husi baliza Filipina nian.
Ekipa Filipina konsege duplika vantajen ba 2-0 liuhusi golu daruak ne’ebé kria husi Banatao Otu Abang aproveita erru iha liña kotuk Timor-Leste nian iha minutu 60.
Maske sofre ona golu rua Timor-Leste sei iha vantajen hodi hetan oportunidade osan-mean hodi hamenus todan golu nian liuhusi Ricardo Bianco nia suta livre maibé sempre hetan salvasaun husi guarda-rede Filipina.
Timor-Leste nia jogadór sira hetan oportunidade barak maibé laiha sorte, ikus oportunidade hirak ne’e hela de’it hanesan oportunidade.
Iha tempu restu jogu nian, Filipina kontinua domina jogu, enkuantu Timor-Leste dalaruma fó ameasa, maibé to’o apitu finál lian eskoru mantein 2-0.
Husi rezultadu ne’ebé iha lalori mudansa ba pontu Timor-Leste nian tanba nafatin mantein ho pontu tolu iha tabele klasifikasaun grupu A, iha ne’ebé Indonézia mak okupa pozisaun primeiru, tuir Filipina, Timor-Leste no ikusliu Kamboja.
Biar nune’e, iha jogu primeiru Timor-Leste konsege hamonu ona Kamboja ho rezultadu 3-2, hodi haforsa Timor-Leste nia pontu ba tolu iha tabela klasifikasaun provizóriu.
Tuir oráriu ne’ebé iha, jogu terseiru iha grupu A, Filipina sei hasoru Kamboja, iha loron 23 fulan-jullu, tuku 21.30 otl, enkuantu Timor-Leste sei hasoru ekipa uma-na’in Indonézia, iha loron hanesan tuku 17.00 otl.
Jogu AFF u-19 tinan-2024 hala’o iha Indonézia kompostu husi grupu A-C.
Grupu A: Indonézia, Timor-Leste, Kamboja, Filipina
Grupu B: Laos, Vietname, Myanmar, Austrália
Grupu C: Malázia, Tailándia, Singapura, Brunei Darussalam
Jornalista: Hortencio Sanchez
Editór: Rafael Ximenes de A. Belo
