DILI, 21 jullu 2024 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas hala’o enkontru bilaterál ho nia omólogu Ministru Negósiu Estranjeiru Portugal, Paulo Rangel, hodi ko’alia kona-ba difikuldade ne’ebé timoroan sira hasoru iha aeroportu Bali no Dubai bainhira halo viajén utiliza Pasaporte Timor-Leste.
Sorumutu entre Ministru rua ne’e hala’o, hafoin partisipa iha reuniaun ordinária Konsellu Ministru Komunidade Ko’alia Lian Portugés (CPLP-sigla portugés) ba dala XXIX iha São Tomé e Príncipé, foin lalais ne’e.
“Problema ne’ebé Timoroan sira hasoru iha aeroportu Bali no Dubai mak, parte imigrasaun husu atu taka viza bainhira viajen ba Portugal, tanba simu orientasaun husi Polísia Seguransa Públika (PSP) Portugal nian,” Ministru Bendito tenik iha nota ne’ebé Agência TATOLI asesu husi media MNEK, ohin.
Ministru Bendito dehan tan, timoroan-sira bele halo viajen husi Dili ba Lisboa Portugal la presiza taka viza, tanba iha ona akordu mobilidade CPLP ho nasaun membru sira.
“Elementu iku mak sai preokupasaun ita hotu nian agora mak kona-ba, sidadaun Timor-Leste ne’ebé lori passaporte mai hetan difikuldade iha aeroportu iha Dubai, iha Bali. Ohin ha’u afirma ho omólogu Ministru Negósiu Estranjeiru Portugal, Paulo Rangel atu haree ida-ne’e, Ministru mós promete kedas katak, nia to’o Lisboa sei kontaktu kedas departamentu relevante PSP (Polísia Seguransa Públika-PSP) atubele haree kona-ba situasaun ida-ne’e, depois sei informa fila-fali mai ita,” governante ne’e tenik iha nota ne’e.
Nia hatutan, Timor-Leste ho CPLP iha akordu mobilidade ida liu ona no loloos laiha problema, maibé Ministru Paulo Rangel sei ko’alia ho sira-nia instituisaun relevante atu haree kona-ba difikuldade ne’e.
Ministru Bendito klarifika, lei foun ne’ebé Governu Portugal foin aprova ne’e laiha relasaun ho situasaun Timor-Leste, maibé ne’e, lei referida nu’udar asuntu interese nasionál Portugal nian hodi kontrola imigrante sira.
Durante enkontru parte rua, ko’alia mós kona-ba Programa Estratéjika Kooperasaun, inklui hato’o intensaun Timor-Leste nian atu bele sai prezidénsia rotative ba CPLP iha futuru.
Enkontru bilaterál ho Ministru negósiu estranjeiru Brazil-Angola
Iha biban ne’e mós, Ministru Bendito hala’o mós enkontru bilaterál ho nia omólogu Ministru Negósiu Estranjeiru Repúblika Federativa Brazil, Mauro Vieira, hodi ko’alia kona-ba futuru kooperasaun ne’ebé Brazil hakarak fó ba Timor-Leste.
“Depois enkontru ida-ne’e, Timor-Leste mós iha enkontru ho ekipa Brazil ne’ebé konfirma teb-tebes sira hakarak hato’o nafatin kooperasaun hanesan uluk nian, liu-liu ba kuadru dezenvolvimentu profesionál, hanesan SENAI Becora, sira hakarak halo tan sira-nia apoiu ka subsídiu intervensaun iha ne’ebá,” Ministru Bendito hateten.
Daudaun ne’e, Repúblika Federativa Brazil, oferese hela projetu kona-ba kapasitasaun rekursu umanu liuhusi administrasaun públika, tanba ne’e, husu atu extende tan projetu referidu ba iha área edukasaun nian, nune’e bele hasa’e liután kapasidade profesór sira-nian.
“Embaixadór Rui Perreira ne’ebé husi Ajénsia Brazileira Kooperasaun (ABC-sigla portugés) konfirma ona katak, Brazil destaka 15 profesór ba Timor, no kontinuadamente sira sei haree situasaun atu eleva tan kooperasaun entre Timor-Leste ho Brazil,” nia dehan.
Alende ne’e, Ministru Bendito Freitas mós hala’o enkontru bilaterál ho omólogu Ministru Relasaun Externa Angola, Téte António, hodi ko’alia kona-ba ajenda vizita Prezidente Repúblika Angola, João Lourenço mai Timor-Leste.
Ministru Bendito dehan, Prezidente Repúblika Angola, João Lourenço konfirmadu sei halo vizita ofisiál ba Timor-Leste iha tinan oin; 2025.
Notísia relevante:Apoia partisipasaun joven nian iha sustentabilidade ekonómika diskutidu iha KM CPLP
Jornalista: Hortencio Sanchez
Editór: Rafael Ximenes de A. Belo
