DILI, 23 jullu 2024 (TATOLI) – Prezidente Sentru Lojístika Nasionál (CLN), António de Araujo Soares, dehan CLN halo ona intervensaun merkadu ba foos ho kuantidade 300 tonelada iha Rejiaun Administrativa Enklave Oe-Cusse Ambeno,(RAEOA), Dili, Ermera, Lautem, Manufahi no Covalima.
“Durante ne’e, ita halo ona intervensaun merkadu ho foos 300 tonelada iha munisípiu neen, hanesan Dili-Atauro foos 50 tonelada, Ermera 50 tonelada, RAEOA 50 tonelada, Lautem 50 tonelada, Manufahi 50 tonelada no Covalima 50 tonelada”, António de Araujo Soares ba TATOLI via telephone, ohin.
Nia dehan, foos subsídiu ne’e, autroidade lokál sira mak identifika ema vuneravel sira atu hetan ida-ne’e, tanba iha nasionál, Governu lahatene, se los mak atu hetan, entaun autoridade sira identifika depois sira rasik halo lista ida no to’o iha ne’eba mak prioridade ba sira ne’ebé mak identifikadu ne’e.
“Intervensaun foos ne’ebé mak ita halo ne’e, kuantidade mínimu ba povu sira ne’ebé mak laiha kbiit atu sosa foos ho folin $19 to’o $22. Tanba ita mós lori foos kuantidade, labarak no ita labele responde hotu, entaun uitoan ka barak, ita presiza duni halo intervensaun ba ita-nia povu”, nia relata.
Soares esplika, Governu sei ba halo tan intervensaun, iha semana oin, ba Munisípiu Baucau no Viqueuqe, depende ba lista hosi autoridade munisípiu sira, se nian mak to’o uluk, Governu halo intervensaun.
“Ita halo intervensaun merkadu ne’e laos ema hotu hetan, maibé ba ema vuneravel sira, maibé planu katak tinan oin ita halo intervensaun tinan tomak, nune’e foos sira iha merkadu folin bele mudansa uitoan, tanba ne’e, ita labele iha situasaun difisil ona mak ita mosu halo intervensaun”, nia afirma.
Nia haktuir, foos folin, daudaun ne’e , karun tanba folin iha merkadu globál mós aas. Nasaun India hanesan produtór foos taka ona entaun hosi buat sira ne’e situasaun mosu oin seluk.
“Ita halo intervensuan ne’e sei kobre hotu iha territóriu nasionál, tanba daudaun ne’e ita-nia foos iha armajen sei sufisiente atu bele kobre hotu”, nia konklui.
Jornalista : Felicidade Ximenes
Editór : Zezito Silva
