Governu laiha relatóriu kona-bá projetu sira implementa iha Oé-Cusse
OÉ-CUSSE, 22 jullu 2024 (TATOLI) – Governu liuhusi Ministériu Planeiamentu no Investimentu Estratéjiku (MPIE), lideradu Gastão Francisco de Sousa, fó sai, daudaun ne’e sei kontinua husu Autoridade sesante atu entrega dadus kona-bá pagamentu ba projetu sira iha Rejiaun Administrativa Espesiál Oé-Cusse Ambeno (RAEOA).
Ministru Gastão Sousa, hateten, antes ne’e Governu koloka Ajénsia Dezenvolvimentu Nasionál (ADN) iha Oé-Cusse tanba orientasaun Primeiru Ministru, atu ajuda Autorudade RAEOA, no pedidu husi Prezidente Autoridade husu apoia téknika mai iha Oé-Cusse, atu verifika no halo fiskalizasaun ba projetu sira molok halo pagamentu.
“Maibé dokumentu laiha, atu halo pagamentu no selu oinsa, ne’e mak ha’u mai atu apoia morál, ha’u husu ba Autoridade sira uluk, tenki kolabora nafatin ho Autoridade atuál, ba dadús ne’ebé ami persiza, fó mai atu ita-bele selu ba projetu sira, atu hatene selu ona hira, selu to’o ne’ebé ona, nune’e bele kontinua pagamentu, husu apoia ba Autoridade sesante, atu mai serbisu hamutuk atu hadi’a povu nia moris,” Gastão Souza ba jornalista sira, iha Oé-Cusse, segunda ohin.
Notisía relevante: DRI no ADN fiskaliza uluk projetu 183 molok halo pagamentu
Governante ne’e informa, ezekusaun ba infraestrutura sira, iha Oé-Cusse ki’ik tebes, tanba sei iha problema balu, labele selu projetu sira tanba obra balu la’o la tuir dalan loos no espesifikasaun, bazea rezultadu inspesaun no verifikasuan husu AND, teste iha laboratóriu hatudu iha irregularidade.
Diretór Ezkutivu ADN, Rui Lourenço da Costa, hateten, dadús ne’e importante tanba, projetu ida dalaruma, nia durasaun ne’e la’os tinan barak, tan ne’e selu tuir progresu.
“Agora dadús tuir progresu laiha, oinsa mak ita-bele selu, ita rekore iha arquivu sira laiha atu no ba iha banku sira ne’e prosesu seluk ona, ne’eb’e ita husu ho haraik-an husu Autoridade sira uluk ho prividénsia atu entrega dadús pagamentu no sertikadu ba projetu sira,” nia husu.
Nia hateten, sekarik lideránsa anterior sira atu koopera providénsia informasaun liu-liu dadus no sertifikadu pagamentu ba projetu ida-idak, ezekusaun Orsamentu Jerál Estadu (OJE) 2025 nian bele sa’e.
“Maibé sei Autoridade anteriór sira lakoi koopera, mak ne’e, instituisaun Parlamentu Nasionál, intituisaun kompetenti sira, hanesan judisiáriu sira, ita hot-hotu iha responsabilidade, orgaun sira seluk, haree tau matan ba ida-ne’e, ami mós hakarak sei bele ami iha prosesu ida-ne’e,” nia espera.
Diretór Rejionál Infraestrutura, Remígio Nunu Sila, informa iha Oé-Cusse projetu hamutuk 183, iha projetu hitu daudaun prosesa ona pagamentu.
“Pagamentu hot-hotu seidauk, pedidu iha projetu hitu mak hatama ona iha Sekretária Rejionál Finansa, atu prosesa, restu ne’e sei verifika hela, ba pagamentu projetu hot-hotu iha Oé-Cusse ne’e seidauk, tanba dokumentu sira-nia kontratu to’o agora ita seidauk hetan, tanba persiza haree hamutuk nune’e públika sasán ho loos,” nia informa.
Tuir nia kona-bá projetu retensaun sira, ida-ne’e depende, sei nia kontratu remata, maibé iha dokumentu balu iha faze identifikasaun, tanba retensaun ne’e persiza nia tempu remata, sekarik nia remata halo sertifikasaun kontinua ba kinspesaun jerál, karik deteta materiál balu la tuir espesifiskasaun bele hadi’a mak foin bele halo pagamentu.
Notisía relevante:ADN sobu ona projetu estrada husi ponte Noefefan-Oenunu
Entretantu, to’o notísia ne’e tuun, jornalista Agência Tatoli seidauk halo konfirmasaun ho Autoridade RAEOA sesante.
Jornalista: Abílio Elo Nini
Editór: Evaristo Soares Martins
