VIQUEQUE, 24 jullu 2024 (TATOLI)- Xefe suku Macadique, postu administrativu Uatulari, munisípiu Viqueque, Afonso dos Reis, husu Governu liuhusi Ministériu Administrasaun Estatál (MAE) aselera prosesu administrasaun; hadi’a dokumentu kartaun eletorál ba suku foun tolu nian.
“Iha mandatu Governu anteriór fó desizaun hili suku bazeia ba lei suku númeru 9/2017 ne’ebé hatuur iha artigu 91o ne’ebé fó kompétensia ba Ministru Administrasaun Estatál deside. Nune’e Governu anteriór aprova konsellu Ministru suku Macadique loke suku foun tolu maka hanesan Macadique de Baixo, Macadique de Cima no Macadique Uaitame. Depois forma hotu iha tinan kotuk to’o dokumentu komunidade kada suku ida-idak nian seidauk trata tanba ne’e ami husu ba nonu Governu aselera ona ami-nia prosesu liuliu dokumentu importante sira hanesan Billete Identidade (BI), kartaun eletoirál no prosesu eleisaun ba suku tolu, ida-ne’e sai hanesan preokupasaun ba ami-nia komunidade sira,” Afonso dos Reis, hateten ba Agência TATOLI, iha postu Uatulari, ohin.
Autoridade komunitária ne’e dehan, objetivu atu loke aldeia, suku, postu no munisípiu hodi lori atendimentu besik ba povu no simu dezenvolvimentu lais ba povu tanba populasaun suku Macadique aldeia hamutuk 21, ho totál uma-kain hamutuk 1.773 no totál populasaun 7.482, kompostu husi mane 3.852 no feto 3.630.
No, suku Macadique ho ninia aldeia hamutuk 21 nunee suku foun tolu maka hanesan Macadique de Cima ho aldeia ualu hamutuk totál uma-kain 420 no abitante totál hamutuk nain-600, Macadique de Baixo ho aldeia hitu hamutuk totál uma-kain 400 no abitante hamutuk na’in-650. Suku rua ne’e ida lokaliza iha parte tasi no ida fali lokaliza iha foho Macadique Uaitame ho aldeia hamutuk neen, ho totál uma-kain 340 no abitante 899.
Rekorda fali katak iha mandatu Governu anteriór liuhusi Ministériu Administrasaun Estatál (MAE) lansa suku foun tolu ne’e iha 09 juñu 2023 no atribui sertifikadu suku.
Reprezenta komunidade suku Macadique, Manuel Soares Luis, prefere Governu atu aselera implementasaun suku foun ne’ebé suku Macadique fahe ona ba suku tolu no fó sai ona iha Jornal da repúblika, maibé to’o agora seidauk realiza.
“Ha’u nu’udar vise koordenadór ba suku foun Macadique de Cima hakarak husu ba Governu liuhusi Ministériu Administrasaun Estatál (MAE) finaliza lalais ona prosesu suku foun nian. Tanba ami-nia suku promulga ona iha prezidente repúblika no fó sai iha Jornal da repúblika. Ida-ne’e legál ona, maibé to’o agora seidauk realiza resesamentu eletorál tuir suku ida-idak ne’ebé hetan aprovasaun. Karik seidauk loos Governu tenke fó hatene fali ba ami, atu ami bele komprende prosesu,” nia realsa.
Hatán ba preokupasaun ne’e MAE, Tomas Cabral, rekoñese iha mandatu anteriór VIII Governu suku foun balu iha hela inklui suku foun tolu iha munisípiu Viqueque.
“Ha’u atu dehan katak ba establesementu suku foun sira iha Governu anteriór ne’e agora daudaun sei prosesu no prosesu ba suku foun sira-ne’e ita sei finaliza iha tinan ida-ne’e (2024). Ha’u hatene Viqueque iha suku tolu sei iha problema uituan tanba ne’e agora ekipa sei buka tuir hodi buka solusaun,” Ministru ne’e dehan.
Governante ne’e afirma, orsamentu ba munisípiu ba tinan-2025 sei iha reajustamentu no sei tau orsamentu ba suku foun sira. “Ba tinan 2025 fulan-outubru ita bele hala’o prosesu eleisaun ba suku foun sira-ne’ebé antes ne’e loke ona,” nia subliña.
Jornalista: Vitorino Lopes da Costa
Editór : Rafael Ximenes de A. Belo
