DILI, 24 jullu 2024 (TATOLI) – Eis -Prezidente Repúblika Taur Matan Ruak, kuarta ne’e, iha Palásiu Prezidensiál Bairro-Pité Dili hasoru malu ho Prezidente Repúblika José Ramos Horta, hodi ko’alia situasaun rai-laran, inklui asidente ne’ebé akontese iha Atambua, Indonézia, foin lalais ne’e.
“Ami hasoru malu ko’alia kona-ba situasaun rai-laran. Iha biban ne’e, Eis-Prezidente Repúblika Taur Matan Ruak informa mós kona-ba dezastre ne’ebé nia rasik hasoru iha Atambua,” Xefe Estadu hateten ba jornalista sira iha Kantina Matak Palásiu Prezidensiál.
Nia dehan, louva ho desizaun Taur Matan Ruak ne’ebé husu ba autoridade seguransa Indonézia labele kastigu soldadu TNI ne’ebé kaer karreta Xoke Taur Matan Ruak nia karreta.
“Louva ho Maun Taur, ida ne’e hatudu nia sentidu Estadu. Nia desizaun ne’ebé foti atu taka kazu ne’e no labele kastigu soldadu TNI ne’e, ida-ne’e hatudu duni nia sentidu Estadu,” Horta katak.
Iha fatin hanesan, Eis-Prezidente Repúblika Jenerál Taur Matan Ruak agradese Prezidente Repúblika tanba konvida hodi fó espasu hodi fahe hanoin ba malu sobre situasaun iha Timor-Leste no mundu.
“Agradese ba Prezidente Repúblika tanba konvida ona ha’u mai ami enkontru kona-ba situasaun rai laran. Iha oportunidade ne’e ha’u mós informa ba Prezidente Repúblika kona-ba foin lalais ha’u hasoru iha Atambua, tanba ida ne’e asidente ida ne’ebé akontese iha ita nia viziñu, entaun ha’u informa ida ne’e,” Taur dehan.
Antigu Primeiru-Ministru ne’e akresenta tan, dezastre ne’ebé akontese ne’e derrepente.
“Akontesimentu ne’e ami la planu, Tentara Nasionál Indonézia (TNI) mós la planu, maibé xoke malu iha ne’ebá. Ha’u rasik husi atu taka kazu ne’e. Ha’u mós husu atu labele kastigu kondutór soldadu ne’ebé lori karreta xoke malu ho ami ne’e. Ha’u husu liu mak tenke respeira regra tránzitu tanba iha karreta tolu mak iha ha’u-nia oin; POLRI nian, Konsuladu nian, no ha’u-nia seguransa nian, maibé sira liu mai xoke ha’u-nia kareta,” Taur haktuir.
Jenerál ne’e hatutan, bainhira akontese asidente ne’e, nia rasik hasoru malu ho Komandante Batallaun 744 TNI, konsuladu Timor-Leste iha Atambua hodi rezolve. “Akontesimentu ne’e bainhira ha’u fila husi Oé-Cusse, ba iha ha’u nia atividade partidu nian,” nia hakotu.
Husi asidente ne’e, Eis-Prezidente Repúblika, Taur Matan Ruak nia kondisaun di’ak enkuantu karreta mak nakbetok uitoan, iha asidente viasaun ki’ik ne’ebé akontese iha Atambua Indonézia, segunda foin lalais ne’e, bainhira ho ekipa iha dalan atu fila hikas mai Dili via Terrestre husi Oé-Cusse.
Kronolojia, asidente soke ne’e akontese kuaze tuku 10 liu oras Indonézia (WITA), iha área Suskoe, Atambua, envolve hosi Karreta TNI nian ho marka Isuzu husi Yonif Raider 744/SYB, soke iha parte liman loos besik motorista tuur ba.
Entretantu hafoin asidente ne’e, Responsável TNI husi Yonif Raider 744, Polísia Tranzitu Atambua, Konsular-TL mai hamutuk rezolve iha Konsuladu Timor-Leste nian iha Atambua.
Iha prosesu rezolve ne’e, parte responsavel TNI nian husi Yonif Raider 744 husu deskulpa ba Eis-Prezidente Taur Matan Ruak ba asidente ne’ebé la espera no prontu responsabiliza ba nia membru nia neglijénsia.
Taur Matan Ruak fó perdaun
Iha sorin seluk, Eis-Prezidente Repúblika Taur Matan Ruak fó perdaun ba motorista ne’e no husu ba parte Komandu TNI Yonif Raider atu taka kazu referidu no husu mós atu lalika kastigu nia membru ne’e, maibé husu atu hadi’ak de’it mak karreta Inova Avansa ne’ebé mós hetan soke hamutuk iha asidente referidu.
Hafoin rezolve tiha, Eis-Prezidente Repúblika ho komitiva kontinua viajen mai Dili.
Jornalista: Hortencio Sanchez
Editór: Rafael Ximenes de A. Belo
