ONG PN-BESI-TL organiza diálogu ho autoridade lokál
DILI, 30 jullu 2024 (TATOLI)–Organizasaun Naun Governamentál Plataforma Nasionál Bee, Sabiamente no Ijiene Timor-Leste (PN-BESI-TL) organiza diálogu ho autoridade komunitária atu rona preukupasaun kona-ba asesu ba bee hodi Governu bele tau iha polítika nasionál.
“Objetivu hosi diskusaun entre autoridade lokal ho ministériu relevante no reprezentante Parlamentu Nasionál kona-ba asuntu infraestrutura hodi rona informasaun no deskobrimentu ba preokupasaun sira hodi bele hapar ba iha planu prioridade sira, hodi bele responde ba problema asesu ba bee no saneamentu iha territoriu,” Prezidente Konsellu Fiskal, PN-BESI-TL, Esmenia Laura Ximenes, ba jornalistas sira iha Caicoli.
Iha objetivu daruak, nia dehan, hakle’an no mellora intervensaun husi Governu parseiru dezenvolvimentu sira hotu hodi atualiza planu prioridade sira-ne’ebé ligadu ho dezenvolvimentu iha setor BESI hodi atinje PEDN 2011-2030.
Objetivu seluk, autoridade lokál sira iha koñesimentu kona-ba saudade mak autoridade kompetente no ministériu relevante sira halo ona no sei halo hodi responde ba problema no dezafiu sira relasiona ho bee no saneamentu iha Timor-Leste.
Iha autoridade lokál husi munisipiu neen hanesan Díli-Ataúru, Baucau, Bobonaru, Covalima, Ermera no Viqueque hodi bele aprezenta sira-nia preokupasaun husi populasaun kona-ba bee no saneamentu.
“Ita iha programa kartaun pontuasaun komunidade ne’ebé implementa iha munisipiu sira-ne’e, ne’ebé halo observasaun avaliasaun no minitorizasaun ba sistema bee rurál. Entaun, ita lori komunidade hodi aprezenta preokupasaun ba Governu,” nia dehan.
Tanba ne’e, iha enkontru ne’e importante oinsá Governu bele prevee orsamentu ba iha Orsamentu Jerál Estadu ne’ebé adekuadu no asegura responsabilidade ba investimentu setór bee no saneamentu iha Timor-Leste.
Iha fatin hanesan, Prezidente Bee Timor-Leste, Empreza Públiku (BTL, E.P), Carlos Peloi, hateten BTL halo esforsu hodi investe iha setór bee hodi bele responde ba iha preokupasaun husi populasaun sira-nian.
Governu kria no investe iha postu administrativu sira oinsá kanaliza bee ba populasaun iha postu sira, maske iha rekursu bee ne’ebé defisil iha tempu bailoron.
“Iha tempu bailoron rekursu bee iha rai leten menus, entaun BTL, E.P esforsu disponibiliza bee durante loron tolu ka haat de’it,” Prezidente Bee Timor-Leste (BTL), Carlos Peloi, hateten ba jornalista sira iha Caicoli.
Prezidente mós refere, BTL iha programa kapitál postu nian hodi fornese no kanaliza bee iha 24 oras nia laran ba populasaun ne’ebé la’o ona iha postu administrativu Vemasse-Baucau, Mehara-Lautem no Railaco-Ermera.
Tuir nia, Governu mós sei implementa iha kapital postu administrativa sira seluk no iha tempu besik sei inaugura iha Liquiça no Ataúro.
Jornalista : Jesuína Xavier
Editór : Cancio Ximenes
