Governu fa’an foos iha Bobonaro ho presu kada saka $12,50
BOBONARO, 07 agostu 2024 (TATOLI)-Governu liuhosi Sentru Lojístika Nasionál (CLN, sigla portugés), kuarta ne’e lansa programa intervensaun merkadu hodi fa’an foos iha munisípiu Bobonaro ho presu normál $12,50 kada saka ne’ebé marka kuantidade kilograma 25.
Intervensaun ne’e bazea ba despaxu husi Primeiru Ministru, Kay Rala Xanana Gusmão ho objetivu atu fa’an liu ba komunidade liu família kbiit laek ne’ebé durante ne’e laiha kbiit atu sosa foos iha merkadu ho foin karun.
Diretór Transporte no Lojístika hosi CLN, Tito da Costa, informa foos ne’e halo intervensaun ba munisípiu 10 ho kuantidade toneleda 500, fahe kada munisípiu hetan tonelada 50.
Hosi númeru ne’e munisípiu Bobonaro hetan saka 2.000 komposta hosi foos lokál saka 1.000 no importadu saka 1.000.
Notísia relevante: CLN sei fa’an foos saka 2,000 iha Bobonaro ho presu normál
“Ami-nia armada hamutuk hitu, ami sei fahe ba postu administrativu neen, ne’ebé mak pertense iha munisípiu Bobonaro nian,” nia katak.
Postu Atabae hetan saka 400, Balibó 400, Cailaco 200, Bobonaro 200, Lolotoe 200 no Maliana.
“Foos ne’e tinan kotuk ami mai hola iha Maliana, hare ne’ebé ita-nia agrikultór sira kuda, depois ami dulas tiha iha ne’e, lori ba Dili, ohin lori mai fali fa’an iha ne’e ho folin ne’ebé baratu,” nia informa ba jornalista sira hafoin lansamentu iha salaun Maria-Tapo.
Biban ne’e, Sekretáriu Autoridade Munisipál ba Asuntu Planeamentu no Dezenvolvimentu Integradu, Semedo Laco, agradese ba Governu no konsidera ho intervensaun ne’e bele responde ka hakmaan netik komunidade sira-nia susar.
“Ita haree katak sasán folin, liuliu foos ne’e loron ba loron ne’e ninia presu ne’e sa’e ba beibeik, entaun ita nia inan-aman sira preokupa, sira-ne’ebé laiha kapasidade ka kbiit atu sosa ne’e hetan difikuldade, entaun ho intervensaun ne’e bele hakma’an ona sira, tanba presiza iha merkadu $18 to’o $29, agora mai halo intervensaun ne’e ita bele hetan de’it ho presu $12,50,” nia katak.
Nia apela ba ekipa CLN atu fa’an foos ba komunidade alvu.
“Foos ne’e fó ba ita-nia inan-aman ne’ebé presiza duni, ita ta’uk monu ba emprezáriu-sira, dalaruma sira bele manipula ninia presu hodi buka lukru. Ita orienta ona ba administradór postu sira atu organiza ema ne’ebé merese hetan ne’e mak hetan duni,” nia akresenta.
Tuir observasaun jornalista Tatoli iha terrenu nota katak komunidade sira entusiasmu sosa foos ho folin baratu ne’e.
Enkuantu intervensaun ne’e CLN halo ona iha munisípiu ualu no sei falta munisípiu rua.
Notísia relevante: Komunidade Holsa la asesu foos lokál ne’ebé CLN fa’an
Jornalista: Sergio da Cruz
Editór: Evaristo Soares Martins
