DILI, 07 agostu 2024 (TATOLI)–Diretór Empreza Walgen Walter 10 Unipesoál, Lda, Walter Martins, hateten obra projetu reabilitasaun ba toilet públiku iha merkadu Taibesi to’o agora ne’e atinje ona 85%.
“Kona-ba reabilitasaun toilet públiku ne’e, iha ami-nia kontaratu ne’e iha fulan neen (6) ba reabilitasaun, dadaun ne’e ita atinje ona 85%. Fulan ida nia laran, ita fui tan estrada nia oin, ami bele entrega ona ba iha Autoriadade Munisipiu Dili no Ministériu Komérsiu no Indústria,”, Diretór Empreza Walgen Walter 10 unip.lda, Walter Martins, hateten ba Agência Tatoli, iha Colmera.
Jerente ne’e hateten, empreza halo reabilitasaun ba item toilet públiku ne’e barak no balun ne’e halo foun duni.
Empreza servisu tuir Planta no Kadernu Enkargu ka Bill of Quantity (BoQ) husi Governu mak hanesan hadi’a toilet públiku nia odamatan, iluminasaun, pinta no kee foun fali tanke sintina nian, odamatan balun foun, troka fatin sentina no lavatóriu.
Empreza mós harii tower bee nian foun rua (2) ba iha merkadu Taibesi nian, maibé servisu ida ne’e la’o hela hodi konklui.
“Iha toilet públiku hamutuk neen (6), maibé iha kuartu haris fatin nian ne’e hamutuk 60,” nia hateten.
Totál orsamentu ba reabilitasaun toilet públiku iha merkadu Taibesi nian ne’e hamutuk $96.502.33, no reabilitasaun ne’e hahú iha konstrui iha fulan rua liuba no sei entrega iha fulan ne’e nia rohan.
Jornalista : Jesuína Xavier
Editór : Cancio Ximenes
