DILI, 07 agostu 2024 (TATOLI) – Governu liuhusi reuniaun Konsellu Ministru (KM), kuarta ne’e, iha Palásiu Governu, Dili, aprova rezolusaun Governu ne’ebé aprezenta hosi Ministra Finansa, Santina José Rodrigues F. Viegas Cardoso, hodi kria Komisaun Interministeriál ba Koordenasaun Dezenvolvimentu Setoriál.
“Komisaun interministeriais ba koordenasaun, ne’ebé kria hosi rezolusaun Governu ida-ne’e, ho objetivu atu otimiza no akompaña dezenvolvimentu iha área infraestrutura, dezenvolvimentu ekonómiku, asuntu sosiais no fortalesimentu institusionál iha Timor-Leste,” Ministru Prezidente Konsellu Ministru (MPKM), Agio Pereira, hateten perante jornalista sira, ohin.
Komisaun sira-ne’e ho objetivu atu asegura efikásia husi ajuda esterna no aliñamentu ho Planu Estratéjiku Dezenvolvimentu Nasionál.
Ho rezolusaun Governu ida-ne’e, estabelese Komisaun interministeriál ba koordenasaun haat, ida-idak ho responsabilidade espesífika.
Komisaun Infraestrutura sei lidera hosi Ministru Planeamentu no Investimentu Estratéjiku (MPIE). Komisaun dezenvolvimentu ekonómiku sei lidera hosi Ministru Koordenadór Asuntu Ekonómiku no Ministru Turizmu no Ambiente. Komisaun asuntu sosiál sei lidera hosi Ministru Koordenadór Asuntu Sosiál. Ikusliu, Komisaun Dezenvolvimentu Institusionál sei lidera hosi Ministru Prezidénsia Konsellu Ministru. Kada komisaun sei inklui reprezentante husi ministériu no sekretaria Estadu oin-oin ne’ebé relevante ba sira-nia área atuasaun nian.
Responsabilidade husi komisaun hirak-ne’e inklui identifika risku, define asaun prioritária sira, koordena asisténsia téknika no prepara planu dezenvolvimentu setoriál. Kada komisaun tenke prodús relatóriu trimestrál kona-ba atividade, ne’ebé sei submete ba Konsellu Ministru.
Apoiu tékniku no sekretariadu sei fornese husi Prezidénsia Konsellu Ministru, Ministériu Finansa no Ministériu Negósiu Estranjeiru no Kooperasaun (MNEK).
Notísia relevante:Governu Aprova Kriasaun Komisaun Interministeriál Dezenvolvimentu Turizmu
Jornalista: Hortencio Sanchez
Editór : Rafael Ximenes de A. Belo
