LOSPALOS, 0𝟖 a𝐠𝐨𝐬𝐭u 𝟐𝟎𝟐𝟒 (TATOLI)- Timor-Leste halo hela preparasaun hodi prenxe rekezitu sira mundiál husi organizasaun nasaun Unida ba Edukasaun,Siénsia no Kultura (UNESCO-United nations education science and Culture Organization) atu rejista Parke Nasionál Nino Konis Santana sai Patrimóniu mundiál.
Timor-Leste kontinua halo preparasaun hodi ba rejista Parke Nasionál Nino Konis Santana hanesan rezeva biosfera iha ámbitu Programa Man and Biosphere (MAB) UNESCO iha Paris, ho objetivu atu hadi’ak parke nia estadu konservasaun no insentiva envolvimentu komunidade iha salvaguadra biodiversidade nian.
Ho inisiativa ne’e, Sekretáriu Estadu Floresta (SEF), Fernandino Veira da Costa akompaña husi Prezidente Autoridade Munisípiu Lautem ho Reprezentante Organizasaun UNESCO vizita parke Nasionál Nino Konis Santana hodi haree no observa sitíu turistíku sira iha parke referidu.
“Ohin ita vizita Postu Administrativu Tutuala, liuliu iha Parke Nasionaá Nino Konis Santana ho objetivu atu haree diretamente sítiu turistiku sira ne’ebé durante ne’e sai potensiál ba vizitante sira, nune’e ba futuru Governu bele dezenvolve hodi atrai turista sira nune’e bele fó rendimentu ba estadu hodi hadia ekonómia Komunidade no Nasaun,” hateten Sekretáriu Estadu Floresta iha Ira-Kusal Suku Mehara, kuarta ne’e.
Membru Governu ne’e subliña tan, objetu sítiu turístiku ne’ebé kontempla tama iha Parke Nasionál nia laran, potensiál tebés sai sitiu turístiku no bele sai patrimóniu mundiál nune’e servisu integradu entre lina Ministériu involve hotu iha laran, nune’e iha futuru atu eleva dezenvolvimentu Parke Nasionál, hodi hasa’e ninia estatutu valór ekolojia rejistu iha Organizasaun Mundiaá ba Edukasaun Siénsia no Kultura (UNESCO) nian.
Iha fatin hanesan , Prezidente Autoridade Munisipál Lautém, Mélio de Jesus afirma ekipa konjunta kompostu husi reprzentante membru Governu, Reprezentante UNESCO iha Indonesia, vizita Parke Nasionál Nino Konis Santana nian, nune’e prepara dokumentu, nune’e reprezenta UNESCO bele rejistu ba iha Organizasaun Mundiál sai patrimóniu mundiál,
“Atividade vizita ne’e organiza husi Ministériu Agrikultura Floresta no Peska liuhusi SEF mai iha fatin Parke ne’e, kontinuasaun husi semináriu iha Dili, nune’e sei halo atividade durante loron tolu”, katak PAM
Iha semináriu ne’e sei estabelese no asina nota entendimentu ida, ne’ebé sai baze dadus ida, nune’e ekipa ne’ebé servisu lori Parke Nasionál Nino Konis Santan ba rejistu iha UNESCO, baihira kumprimenta ba rekezitu sira hodi sai nu’udar Organizasaun Internasionál ne’ebé tau matan ba sítiu nasionál sira.
“Organizasaun UNESCO mai vizita hodi apoiu atu Timor-Leste kumpri kritéria sira, nune’e ita hein fulan-Setembru bele anunsia iha Xina, nune’e parke Nasional Nino Konis Santana bele sai ona patrimóniu Mundiál,” katak PAM Lautem.
Nia argumenta, Ekipa ne’ebé atu rejistu hodi priense rekezitu sira, antes tama ba iha Parke Nasionál Nino Konis Santana, nune’e ba iha kategoria ida ne’ebé, tanba Parke tama ba iha kategoria lima, iha mundu kategoria hamutuk 1 to’o 10, tanba ne’e parke nia natureza diferente ho nasaun sira sira seluk nian.
Entertantu delegasaun vizita parke nasionál kompostu husi lina ministeriál husi Ministériu Agrikultura, Pekuária , Peska no Floresta, Ministériu Turízmu Ambiente, Ministériu Edukasaun, Ministériu Ensinu Superiór no Ministériu Negósiu Estranjeiru no Sekretáriu Estadu Arte no Kultura.
Jornalista: Anito Soares
Editór: Florencio Miranda Ximenes
