DILI, 10 agustu 2024 (TATOLI) –Ministru Nelyo Isaac Sarmento simu delegasaun Dojan KONI no EGT ne’ebé partisipa iha kampionatu KAJARI NTT Open 2024 ne’ebe realiza iha Kupang, Nusa Tenggara Timur (NTT), Indonézia konsege rekolla medalla hamutuk 30.
Iha kampionatu ne’e, atleta Dojan KONI no EGT ne’e konsege hetan medalla 30 kompostu husi osan mean 16, osan mutin hitu no osan metan hitu no okupa fatin daruak.
“Parabéns ba imi-nia prestasaun no mantein nafatin treinu hodi prepara aan ba kampionatu seluk,” Ministru Nelyo kongratula no enkoraja liuhusi nota ne’ebé Agência TATOLI asesu, hosi media MJDAK, ohin.
Ministru Nelyo fiar katak ho eventu internasionál tinan-2025 hanesan jogu desportiva CPLP no SEA Games Thailandia atleta balun husi KONI no EGT bele partisipa iha selesaun nasionál nian.
Membru Governu ne’e mós husu, futuru tenki hanorin mós atleta foun sira desportu arte iha Taekwondo nian.
Enkuantu, Oscar Lucio nu’udar koordenador ba Dojan KONI rekoñese tinan ne’e la konsege okupa fatin dahuluk tanba númeru atleta ne‘ebé partisipa tuun kompara tinan-2023 ho razaun atleta sira hasoru ezame iha ida-idak nian eskola.
“Ami-nia ekipa hetan medalla hamutuk 30. Husi ne’e, 16 medalla osan-mean, Osan-metan hitu no mutin hitu ho ida-ne’e Taekwondo Koni hetan segundu Lugar no ekipa dojan KONI atleta mane ida hetan mellor atleta iha eventu refere,” Oscar tenik.
Totál atleta ne’ebé ba partisipa iha eventu ne’e hamutuk 50; mane 31 no feto 29 inklui Treinadór na’in rua no responsavel na’in rua no hetan apoiu husi MJDAK no Gabineti Prezidenti Repúblika no-mós setór privadu sira seluk.
Koordenadora Dojan EGT, Celfia M. da Silva Freitas mós informa katak husi nia dojan konsege koleta medalla lima ne’ebé hetan husi osan mean ida, mutin rua, no metan tolu.
“Tuir lolos ekipa atu lori atleta na’in-20 maibé tanba oráriu soke malu ho estudante sira nia ezame nune’e ekipa lori treinadór no atleta hamutuk ema na’in-12,” Celfia esplika.
Jornalista: Hortencio Sanchez
Editór: Rafael Ximenes de A. Belo
