Trail Timor-Leste husu apoiu ba Xefe Estadu atu realiza mini-motocross
DILI, 11 agostu 2024 (TATOLI) – Grupu Trail Timor-Leste husu Xefe Estadu, José Ramos Horta atu apoiu sira-nia atividade kompetisaun mini-motocross (Enduro) iha Munisípiu Dili hodi harame ámbitu komemorasaun loron Konsulta Populár ba dala-25.
“Atividade ne’e sei realiza, la’ós de’it kona-ba kompetisaun mini-Motocross (Enduro), maibé iha mós atividade asaun karitativa,” Prezidente Trail Timor, José D. Xavier ba jornalista sira iha Palásiu PR, sesta ne’e.
Nia dehan, durante enkontru Xefe Estadu husu atu hatama proposta ba Prezidénsia Repúblika nune’e bele fó apoiu.
Tuir oráriu ne’ebé iha atividade ne’e sei realiza iha loron 31 fulan-agostu ne’e iha kapitál Dili.
Hafoin enkontru ho Trail Timor-Leste, iha parte seluk, Prezidente Repúblika, José Ramos Horta simu mós audénsia ida husi reprezentante kompañia Maine Group Ltd, Lúcio Francisco Caero Silva hodi aprezenta pedidu investimentu ba produsaun ekipamentu pezadu ba konstrusaun nian iha Timor-Leste.
Empreza Maine Group husi Irlándia-Norte no hakarak investe iha Timor-Leste hodi bele kontribui mós fó servisu ba joven sira nune’e Prezidente Repúblika husu atu hatama karta formál ba Guvernu Timor-Leste.
Notísia relevante:Governu investe iha área produtivu sei redús problema multidimensionál
Jornalista: Hortencio Sanchez
Editór: Rafael Ximenes de A. Belo
