Reabilitasaun toilet públiku iha merkadu Manleuana konklui iha agostu nia rohan
DILI, 12 agostu 2024 (TATOLI)–Diretór Empreza Reynazhunior Unipesoál, Lda, Juscelino de Jesus Pereira, hateten reabilitasaun toilet públiku iha merkadu Manleuana atinje ona 80% no sei konklui iha fulan-agostu nia rohan.
Nia hateten, toilet públiku neen (6) maibé empreza entrega uluk ona rua (2) ba iha Ministériu Komérsiu no Indústria.
Toilet públiku ne’e kompostu husi kuartu sia (9) no kada unidade toilet públiku ne’e kompleta ho toilet públiku ida ba ema ho defisiénsia sira.
“Reabilitasaun ba toilet públiku haat ne’ebé hela ne’e aprezenta ona persentajen hamutuk 80% no hela 20% atu konklui,” Diretór empreza ne’e hateten ba Agência TATOLI, liuhusi telefónika, segunda ne’e.
Serbisu reabilitasaun ne’ebé halo mak troka azuleiju, sanita, odamatan no pinta foun parede sira no kanaliza bee-moos ba serbisu jetasaun merkadu no toilet públiku sira-ne’e hotu.
Diretór ne’e hateten, serbisu ba reabilitasaun sira kuaze ramata ona, hela mak oinsá pinta parede sira-ne’e no kanaliza bee-moos.
“Iha fulan ida-ne’e nia rohan, ami bele konklui. Tuir kontratu ne’e, iha fulan neen maibé serbisu kuaze hotu ona,” nia dehan.
Orsamentu ba reabilitasaun ne’e hamutuk rihun $99-resi hosi Ministériu Komérsiu no Indústria ne’ebé selu ba kompaña hodi halo reabilitasaun.
Jornalista : Jesuína Xavier
Editór : Cancio Ximenes
