MI presiza tau atensaun ba transporte iha PNTL eskuadra Turiscai
DILI, 14 agostu 2024 (TATOLI)—Deputadu CNRT, José Virgílio, husu Ministériu Interiór (MI) ho komandu PNTL presiza tau atensaun ba difikuldade transporte ne’ebé polísia eskuadra postu Turiscai, munisípiu Manufahi daudaun ne’e hasoru.
“Ha’u hakarak foti kestaun iha eskuadra postu Turiscai, sira hato’o mai fulan tolu ona sira-nia karreta operasionál nian ida de’it, maibé sei hala’o manutensaun to’o agora seidauk haruka ba. Sira iha motorizada 10 maibé sira halo kontrolu iha suku 11 no aldeia 40,” nia levanta iha uma fukun Parlamentu Nasionál.
Nia dehan, kondisaun motorizada balun ladi’ak to’o agora sira rasik hadi’a maibé tinan sanulu ona laiha manutensaun husi parte lojistika PNTL nian, nune’e husu ba Ministériu Interiór tau matan liuliu prevee orsamentu hodi haree.
Aleinde ne’e, nia hateten, presiza iha moru protesaun ba edifísiu eskuadra postu Turiskai nian.
Vise Ministru ba asuntu Parlamentár, Adérito Hugo da Costa, hateten loos duni iha Turiscai hanesan mós eskuadra polísia sira seluk seidauk bele hadi’a ninia infraestrutura hanesan mós transporte ne’ebé sira simu no motorizada ne’ebé Ofisiál Polisiamente Suku (OPS) simu ne’e.
Kuaze tinan sanulu ona no iha komandu ninia jestaun komandu sira anteriór hateten ona katak, motorizada ne’e entrega ba sira no sira mak halo manutensaun rasik no uza rasik kombustível depois sai alineasaun ba privadu bainhira troka fali foun.
To’o agora seidauk halo mudansa ba motorizada foun ba sira, maibé sei envia asuntu ne’e ba MI atu haree kondisaun infraestrutura inklui karreta.
Jornalista : Nelson de Sousa
Editór : Cancio Ximenes
