SEI propoin proposta adisionál millaun $7-resin
DILI, 19 agostu 2024 (TATOLI)—Ekipa husi Sekretaria Estadu Igualdade (SEI) aprezenta proposta adisionál millaun $7-resin iha Orsamentu Jerál Estadu (OJE) 2025, justifikasaun inklui programa prioridade sira ba Komité Revizaun Orsamentu (KRO).
“SEI aprezenta orsamentu adisional hamutuk millaun $7-resin ba tinan 2025,” Sekretária Estadu Igualdade, Elvina Sousa Carvalho, hateten, hafoin aprezentasaun, iha auditóriu Ministériu Finansa (MF), Aitarak-laran, segunda ne’e.
Proposta orsamentu SEI nian ba tinan 2025 ne’ebé mak aprezenta tuir tetu orsamentál hamutuk $1.385.595, ne’ebé no fahe ba iha kategoria rua hanesan saláriu no vensimentu hamutuk $669.350 no bens no servisu korrrente $716.245.
Notísia relevante : KM aprova rezolusaun Governu kona-ba definisaun komité revizaun OJE 2025
Nune’e mos, iha proposta orsamentu SEI tuir adisionál ne’ebé iha fahe ba kategoria haat ho totál 1.066.257.74, kompostu husi saláriu no vensimentu $501.943, bens no servisu korrente $ 214.314, kapitál menór $100.000, no transférensia públika $250.000.
Alende ne’e, SEI mos tau proposta orsamentu ba kapitál dezenvolvimentu ho nia objetivu atu harii edifísiu foun ho montante orsamentu millaun 6,273-resin.
Tanba ne’e, SEI nia totál orsamentu adisional ba tinan 2025 hamutuk millaun $7-resin.
Jornalista : Osória Marques
Editora : Julia Chatarina
