Sarani 7.805 hosi Maliana rejistadu partisipa misa iha Dili
BOBONARO, 02 setembru 2024 (TATOLI)-Sarani sira iha Parókia Maliana hamutuk na’in-7.805, segunda ne’e entuzista simu atributu hanesan kamizola no sumriña hodi prepara-an atu partisipa misa iha Tasi-Tolu, Dili, ne’ebé sei Prezidente direita husi sua Santidade Papa Francisco.
Pároku Igreja Santa Cruz Maliana, Valerio Gusmão, informa, dadus provizóriu husi Dioseze Maliana to’o loron (02/09/2024) sarani Munisípiu Bobonaro ne’ebé rejistadu atu partisipa iha misa ne’e hamutuk na’in-7.805.
Notísia relevante: Sarani sira husi Ainaro hamutuk 9.000 sei partisipa misa solene iha Tasi-Tolu
“Ida-ne’e seidauk tama tán sira-ne’ebé naran rejistu tiha depois staff sira la konsege hatama, bele to’o 8,000 hanesan ne’e,” Padre Valerio Gusmão,bhateten durante halo enkontru ho autoridade munisípiu Bobonaro, postu no autoridade seguransa iha salaun Maria-Tapo, tersa ne’e.
Enkuantu daudaun ne’e Parókia idak-idak iha postu administrativu neen sei kontinua simu rejistrasaun ba sarani sira-ne’ebé hakarak partisipa iha misa ne’e.
Sarani hosi Maliana, Felismina dos Santos, kontente no haksolok tebes atu partisipa misa solene ne’e no konsidera vizita ne’e nu’udar istória ba daruak nia ulun boot uma kreda mundiál vizita Timor-Leste.
“Ami hakarak tebes ba simu bensaun hosi Santu Padre, ami fiar katak ho vizita Amu Papa nia ne’e ami sei bele hetan pas no dame mai am, liuliu ami-nia nasaun doben Timor-Leste,” nia informa ba jornalista sira iha Igreja Parókia Maliana, segunda ne’e.
Tuir informasaun ne’ebé Ajénsia TATOLI asesu liuhosi enkontru preparasaun ikus ne’ebé organiza husi Autoridade Munisípiu Bobonaro, tersa ne’e katak, karreta 300-resin mak sei tula peregrinu sira husi postu administrativu idak-idak ba fatin konsentrasaun Kaitehu, Liquiçá no ba fatin altar Santu Tasi-Tolu, Dili.
Notísia relevante: Sarani hosi Bobonaro sei konsentra iha Kaitehu
Jornalista: Sérgio da Cruz
Editór: Evaristo Soares Martins
