DILI, 05 setembru 2024 (TATOLI)—Vise bankada FRETILIN, David Dias Ximenes “Mandati’’, ninia esperansa ba vizita Sua Santidade Amu Papa Francisco nu’udar Xefe Estadu no líder Katóliku mundiál mai iha Timor-Leste bele lori dame no esperansa oioin.
“Esperansa dahuluk mak solidariedade ba malu. Daruak mak justisa. Datoluk, seguransa no da-haat mak umanizmu. No, Papa Francisco atu lori duni dame mai no dame ne’e la’ós laiha funu ne’e. Dame ne’e ita-nia hadomi malu ne’e mak importante. Hadomi malu ne’e katak la signifika sala ida la ko’alia. Buat sala ne’e ita ko’alia. Diferensa ne’e tenke iha hodi dinamiza ita-nia pensamentu. Bainhira ita-nia pensamentu dinamizadu relasiona ho kestaun impérika ne’ebé ita haree, ita absorve, ita hanoin no diskute ba malu oinsá mak atu sai di’ak-liu. Ida-ne’e mak ita hanoin malu no diferensa ne’e tenke iha no labele lori fali diferensa ne’e sai fali inímigu ne’e labele,” Nia hateten ba Agência TATOLI iha sala bankada iha Parlamentu Nasionál (PN).
Nia apela, timoroan hotu atu kontribui pás no situasaun hakmatek hodi bele simu vizita Amu Papa Francisco mai iha ita-nia rain Timor-Leste.
Xefe Bankada PLP, Maria Angelina Sarmento, konsidera vizita Sua Santidade Amu Papa Francisco mai ita-nia rai tanba povu fi’ar-na’in.
“Vizita Santru Padre nian, la’ós mai vizita ema riku, mai tanba povu fi’ar-na’in ne’ebé ki’ak, marjinalizadu, sakrifikadu ba ukun an ida-ne’e,” nia dehan.
Jornalista : Nelson de Sousa
Editór : Cancio Ximenes
