PR Horta fiar jornalista timoroan halo kobertura di’ak durante vizita Papa Francisco

DILI, 04 setembru 2024 (TATOLI) – Prezidente Repúblika, José Ramos Horta, fiar ba jornalista hotu iha Timor-Leste atu halo kobertura di’ak no másimu durante vizita Sua Santidade Papa Francisco iha Timor-Leste, hahú husi loron 9 to’o 11 setembru ne’e.

“Ba jornalista sira hotu, RTTL mak sei halo transmisaun direita, maibé ba media hotu, ha’u iha konfiansa ba imi hotu sei halo kobertura ho di’ak ho imi nia dedikasaun hanesan baibain imi hatudu ne’e, ne’ebé ha’u fiar imi serbisu di’ak iha durante vizita Amu-Papa,” Horta tenik ba jornalista sira iha Dili, kuarta ne’e.

Notisia relevante:Jornalista 458 sei halo kobertura ba vizita Papa Francisco iha Timor-Leste

Nia dehan, kobertura ne’ebé jornalista sira halo boot no todan maibé iha ona esperiénsia naton fiar katak sei halo servisu hotu ho másimu.

“Fiar imi jornalista hotu husi media ne’ebé de’it, ho esperiénsia ne’ebé imi iha sei hala’o servisu hotu ho susesu, tanba eventu vizita Amu-Papa nian ne’e boot liu atividade hotu, hanesan kopa mundiál, jogu olimpíku no seluk tan,” nia enkoraza.

Durante vizita Papa iha Timor-Lesre sei halo tranzmisaun direita husi media Vatikanu nian, RTTL,EP, GMN no media nasionál sira hanesan TATOLI no seluk tan sei simu tutan hosi RTTL, EP hodi halo transmisaun direita.

Notisia relevante:Xefe Estadu louva Governu halo preparasaun di’ak simu Papa Francisco

Jornalista: Hortencio Sanchez

Editor: Florencio Miranda Ximenes