DILI, 04 setembru 2024 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, hateten jornalista nasaionál no intenasionál hamutuk 485 ne’ebé rejistradu, sei kobre Papa Francisco nia vizita Estadu no vizita pastorál iha Timor-Leste, iha 09 to’o 11 setembru 2024.
Notísia Relevante: Jornalista 362 rejistadu halo kobertura ba vizita Papa Francisco
Governante ne’e esplika, totál husi númeru ne’e sura ho jonalista na’in-88 ne’ebé durante ne’e akompaña Papa Francisco iha Papa nia aviaun husi Roma hodi vizita ba Indoézia, Papua Novaguine no mai Timor-leste.
“Jornalista nasionál no internasionál ne’ebé hamutuk atu halo kobertura ba amu Papa nia vizita ne’e hamutuk 485. Totál jornalista ne’e, husi jornalista ne’ebé akompaña Papa iha aviaun hamutuk 80 no jornalista estranjeiru 75 ne’ebé aplika liuhusi online no jornalista nasionál (timoroan) hamutuk 300,” Sekretáriu Estadu Komunikasaun Sosiál (SEKOMS), Expedito Dias Ximenes, hateten ba jornalista sira iha Motael.
Governante ne’e hateten, iha jornalista husi mídia nasionál neen (6) mak seidauk kompleta dokumentu hodi asesu ba karta kredensiál, maibé ida-ne’e sei iha prosesu atu kompleta.
“Kolega husi mídia neen bele kompleta dokumentu ohin no aban bele simu fali sira-nia kartaun kredensiál,” nia dehan.
Governu no igreja fornese sentru mídia tolu (3) ba jornalista sira hanesan iha Ministériu Transporte Komunikasaun no Transporte, iha Tasi-Tolu no iha Hotel Hilton.
“Kolega sira-ne’ebé iha sentru mídia sira bele hetan output hodi halo publikasaun. Internet sentru mídia tolu ne’e garantidu,” nia dehan.
Jornalista : Jesuína Xavier
Editór : Cancio Ximenes
