DILI, 07 setembru 2024 (TATOLI)–Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Orlando Gomes, husu ba vendedór vítima ne’ebé hetan agresaun fízika iha Kampung Baru bele hato’o keixa, tanba kazu refere rejista ona iha eskuadra Dom Aleixo nian.
Notísia Relevante: PR Horta kondena maka’as SEATOU halo atuasaun agresivu hasoru negosiánte ambulante
“Polísia iha atu halo atendimentu ba públiku. Sé mak sente katak sai vítima, nia bele ba halo eskuadra ka postu ne’ebé besik. Iha ita-nia eskudra Dom Aleixu prontu atu simu kualker keixa atu inisia prosesu,” Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Orlando Gomes, apela liuhusi konferensia imprensa, iha Colmera.
Nia hateten, dalaruma eskuadra Dom Aleixo perokupa ho serbisu barak, maibé iha komandu PNTL munisipiu Dili bele halo atendimentu ba sidadaun ne’ebé sente sai vítima ne’e bele ba hato’o keixa.
Tanba, nia dehan, nia parte simu ona informasaunhusi husi komandu eskuadra Aimutin nian katak rejista ona vitima balun no enkamiña ona ba iha Ministériu Públiku.
“Daudaun ne’e Vítima sira-ne’ebé halo keixa iha ona rejistu iha ona númeru NUC sira no aprezenta ona ba iha Ministériu Publiku atu sira bele Check sira-nia kazu no númeru NUC iha sesaun investigasaun eskuadra Dom Aleixo atu bele hatene,” nia dehan.
Inspetor ne’e hateten, PNTL disponível atu simu keixa tanba polísia iha atu halo atendimentu ba públiku ka ba sidadaun sira-ne’ebé mak sente sai vítima.
Antes ne’e, Jerente Fundasaun Maubere Advocacia (FMA), Constantino de Jesus, hateten Sei aprezenta mós keixa kriminál ida ba iha MP, tanba Polísia Nasionál Timor-Leste la simu keixa kona-ba ekipa SEATOU baku vitima sira iha loron 03 setembru 2024 ne’e.
“Akontesimentu horibainrua, vitima rasik hato’o keixa ba Polisia maibé polísia rejeita no duni nia husi sala keixa nian. Ida-ne’e hatudu polísia la kompreende saida mak hakerek iha Kódigu Penal. Ita hakarak promove asaun kriminál ba iha MP.” Nia dehan.
Nia explika, vitima hakarak lia-loos ba asaun krime ne’ebé nia hasoru maibé polísia rasik rejeita, tanba ne’e mak kazu sei aprezenta diretamentu ba iha MP.
Jornalista : Jesuína Xavier
Editór : Cancio Ximenes
