DILI, 10 setembru (TATOLI)–Membru grupu Uniaun Eskuteitu Nasionál Timor-Leste (UNE-TL) iha Metinaro, Laura das Belas, sente kontente no espesiál envolve iha ministra estraordinária hodi fahe komunaun ba sarani sira iha misa solene ne’ebé Papa Francisco sei prezide iha Tasi-Tolu, iha orsida lorokraik (tuku 16h30).
Nia dehan, iha tempu okupasaun Indonézia liuliu iha loron 12 outubru 1989 bainhira Papa São João Paulo II mai vizita Timor-Leste, nia labele partisipa tanba seidauk iha kartaun eleitorál, maibé agora nia sente hasolok tebes tanba bele partisipa iha misa solene ne’e.
“Papa Francisco nia vizita ne’e, ha’u sente sente kontente tebes. Kontente tanba amu Papa ida mai primeiru ne’e ha’u sei iha tinan 15. Agora besik idade ba tinan 50, amu Papa mai vizita ne’e, ami sente kontente. Depois tama iha ministra estraordinária ne’e sente kontente tebe-tebes. Orgullu boot no sente espesiál, maske ema sarani barak rihun ba rihun, maibé iha parokia hili nia ha’u sai ministra estraordináriu. Presiza haree ema-ne’ebé ativu iha misa no partisipa ativa iha igreja no moris loron-loron. Entaun sira bolu ami ba tuir formasaun. Orgullu tebe-tebes,” Laura das Belas hateten ba Agência Tatoli iha Rezidénsia Madre Salesiana iha Maria Auxiliadora, iha Comoro.
Nia sente kontente tanba bainhira indika nia sai ministra estraordinária ne’e, nia hetan oportunidade hodi tuir formasaun iha parokia Metinaro.
“Kada semana ami tuir formasaun no retiru. Formasaun ne’e ami tuir daneen. Ikus iha semana kotuk ne’e mak ami tuir formasaun no retiru no iha mós sakramentu konfisaun,” nia dehan.
Nia estatutu hanesan kaben-na’in, no nia kaben ho Domingos Sávio ne’ebé Maromak haraik grasa domin nian ho oan na’in-tolu (3).
Iha vida loro-loron nian, ninia família partisipa ativa iha grupu Uniaun Eskuteiru Nasionál Timor-Leste (UNE-TL) iha parokia Metinaro.
Agardese, nia dehan, nia ho nia laen-kaben Domingos Sávio tama iha grupo ministru/a estraordináriu no sira-nia oan na’in-rua tama iha seguransa komplementár husi UNE-TL ba vizita amu Papa nian.
“Ami koñese malu iha grupu UNE-TL mak forma familia,” nia dehan.
Jornalista : Jesuína Xavier
Editór : Câncio Ximenes
