MD sai sasin ba asaun solidaridade husi Povu Portugal ba eskola koléjiu Maliana
Bobonaro, 13 setembru 2024 (TATOLI)- Ministru Defeza (MD), Donaciano Costa Gomes Pedro ‘Klamar Fuik’, sesta ne’e, sai sasin ba asaun solidaridade ne’ebé mai hosi povu Portugal no Asembleia Asesór Portugál ba eskola sekundáriu Koléjiu Infante de Sagres iha Maliana Vila, munisípiu Bobonaro.
“Tanba ne’e, Ohin ami mai Koléju Infante de Sagres Maliana hodi sai testamuña ba apoia materia eskola nian husi povu Portugal no Asembleia Asesoria hamutuk halo jestu solidadridade hodi oferese matetriál didatika, pedakokia no laptop unidade 30 ne’ebé sai nesesariu ba eskola ne’e hodi estudante sira bele utiliza iha prosesu apredijazen”, dehan Ministru Donaciano Costa Gomes Pedro ‘Klamar Fuik’, ba jornalista sira, iha kolegiu Maliana, sesta (13/09).
Governante ne’e hatutan, materia eskolár ne’ebé povu Portugál oferese hanesan livru, sasán brinkadeiru, materiál desportiva no laptop.
“Ha’u sente jestu solidadridade ida-ne’e sai importante ne’ebé mai husi povu Portugal ba povu Timor Leste distribui ba estudante sira iha koléjiu ida-ne’e”, nia afirma.
Inisiativa ida-ne’e, Governante ne’e dehan: “Mai husi Asesór Almirante Silva Ribeiro husi Portugal ne’ebé maka ami na’in rua halo vizita eskola ida-ne’e iha fulan Fevereiru 2024, no Fundadór eskola Koléjiu Infante de Sagres Saudozu Padre Manuel S. Luis hodi fó omenajen ba padre. Nune’e ami kontaktu ba Governu rejionál no asembleia rejionál asesore sira nian hodi fó votu kontribuisaun sosidaridade ba koléjiu ida-ne’e”,
Nune’e Ministru ne’e dehan, apoia ida-ne’e ba estudante sira hodi hetan edukasaun ida-ne’ebé di’ak, atu estudante sira bele dezenvolve sira-nia an iha mundu edukasaun ne’ebé oin loron sai kompetetivu.
“Ita hatene katak edukasaun sai importante ba ita-nia foinsa’e sira hodi prepara sira atu kontinua Estadu no nasaun RDTL ne’ebé ita hari’i ho sakrifisiu barak”, nia hato’o.
Iha fatin hanesan, Diretór Koléjiu Infante de Sagres Padre Roberto da Conceição, husu obrigadu no agradese MD no Almirante ne’ebé kolabora di’ak ho Koléjiu Infante de Sagres hodi halibur no apoia sasán eskolár nian.
“Ami husu agradese ba tulun ne’ebé fó mai ami, ami simu sasán eskolár ho kontetór ida mak hanesan livru, brinkadeiru, roupa no laptop. Laptop ami instala ona iha sala ida atu estudante sira uza”, agradese Padre Roberto.
Kona-ba livru sira, nia dehan sei loke biblioteka atu estudante sira iha Maliana bele asesu.
Alende ne’e nia dehan, iha mós livru ba Ensinu Báziku nian nune’e livru sira-ne’e sei fahe mós ba ensinu báziku sira-ne’ebé iha Maliana.
Tuir observasaun jornalista Agência Tatoli iha serimónia distribuisaun materiál eskolár iha Koléjiu Infante de Sagres estudante sira sira simu Ministru Defeza (MD), Donaciano Costa Gomes Pedro ‘Klamar Fuik’ no Almirante Silva Ribeiro ho dansa kultura.
Hafoin ramata kontinua distribui materiál eskolár ne’ebé entrega direta hosi Ministru Defeza (MD), Donaciano Costa Gomes Pedro ‘Klamar Fuik’ no Almirante Silva Ribeiro ba estudante Koléjiu Infante de Sagres. Ramata distribuisaun ministru no aseor almirante no akomapaña husi diretór eskola kontinua ba vizita sala pratika komputadór Kolégiu Infante de Sagres.
Tuir dadús estudante sekundáriu koléjiu husi klase 1 to’o 3 totál hamutuk na’in-300 no profesór totál na’in-28.
Jornalista : Vitorino Lopes da Costa
Editór : Florencio Miranda Ximenes
