DILI, 18 setembru 2024 (TATOLI)–Reabilitasaun toilet públiku iha merkadu Manleuana atinje ona 100% no hein de’it entrega ba Governu.
Diretór kompañia Reynazhunior Unipesoál, Lda, Jucelino de Jesus Pereira, hateten daudaun ne’e sira hein hamoos de’it foer sira hanesan materiál konstrusaun nia restu no reabilitasaun toilet públiku.
“Ami hela hamoos de’it azulezu no blok rahun sira ba konstrusaun no reabilitasaun ba toilet públiku sira-ne’e. Ami termina iha semana ida-ne’e nia laran,” Diretór Kompañia Reynazhunior Unipesoál, Lda, Jucelino de Jesus Pereira, ba Tatoli.
Tanba, nia hateten, obra reabilitasaun hotu ona entaun empreza sei hatama pediu ida ba iha Ministeriu Komersiu no Indústria no Autoridade Munisipál Díli (AMD) hodi bele halo inspesaun.
“Ami sei hatama karta ida ba Ministériu atu halo inspesaun, molok ita halo termu entrega ba Governu no jestaun merkadu kona-ba obra reabilitasaun toilet públiku,” nia dehan.
Tuir nia, obra reabilitasaun ne’e hotu tuir pedidu no dezeñu Governu nian atu negosiante sira bele utiliza.
Jerente ne’e hateten, iha mós serbisu adisionál ne’ebé Governu husu hanesan tau rede hale’u toilet públika fatin sira-ne’ebé reabilita hotu ona, maibé ida-ne’e seidauk iha fixu loloos.
Toilet públiku hamutuk unidade neen (6) maibé empreza entrega ona rua (2), no kada unidade toilet públiku ne’e kompleta ho haris fatin kuartu ida ba Ema ho Defisiénsia (EhD) sira.
Orsamentu ba reabilitasaun ne’e hamutuk rihun 99-resin husi Ministériu Komérsiu no Indústria ne’ebé selu ba kompañia hodi halo reabilitasaun.
Jornalista : Jesuína Xavier
Editór : Cancio Ximenes
