DILI, 20 Setembru 2024 (TATOLI) – Responsável ba Programa Saúde Ambientál iha Servisu Saúde Munisípiu Dili, Natalino Aleixo, hateten Suku Bebonuk deklara ona Área La-soe Fo’er-boot Arbiru (ALFA).
Munisípiu Dili iha suku sia mak deklara ona ALFA hanesan Suku Bebonuk, Madohi, Balibar, Sabuli, Motael, Bidau Santana, Kuluhun, Vila-verde no Ailok-Laran”, Natalino Aleixo informa ba TATOLI iha Suku Bebonuk, horseik.
Natalino dehan, Suku Bebonuk deklara ona katak komunidade hotu iha Suku Bebonuk asesu ona ba sintina ka la soe foer boot arbiru, katak uma-kain hotu asesu ba sintina.
“Sira ne’ebé mak deklara ona ne’e signifika sira iha hotu ona sintina katak la soer foer arbiru, maibé ba sira ne’ebé mak seidauk asesu ba ALFA ne’e ita nafatin fó informasaun ligadu ho vantajen husi uza sintina mak saida no impaktu negativu saida mak mosu ba ita-nia uma-laran, banhira ita la uza sintina, hanesan ita hotu hatene katak bainhira ita la uza sintina impaktu ida mak banhira soe foer boot arbiru de’it, lalar ba hobur, ita-nia foer mai tur fila fali ba hahan ne’ebé mak ita prepara ne’e mós prezudika ba ita-nia saúde”, nia afirma.
Iha fatin hanesan, Xefe Suku Bebonuk, Alfredo da Costa deklara katak Suku Bebonuk livre ona husi área la soer foer arbiru.
“Ami agradese ba UNICEF, Fundasaun Alola no Ministériu Saúde ne’ebé mak mai to’o ami nia suku hodi fó imformasaun ba ami kona-ba impaktu husi soe foer arbiru ho ida-ne’e, ami organiza ami-nia povu hodi halo nia sintina, atu labele soe foer boot arbiru”, Alfredo da Costa dehan.
Suku Bebonuk ho nia populasuan hamutuk 1.5795 no uma-kain 2.943 ne’ebé asesu hotu ona ba sintina.
Jornalista : Felicidade Ximenes
Editór : Zezito Silva
