Governu sei aprezenta rezultadu konferénsia APF iha enkontru Rejionál
DILI, 21 setembru 2024 (TATOLI)–Reprezentante segundu Vise-Primeiru-Ministru, Mariano Asanami Sabino, atuál Ministru Interiór, Francisco da Costa Guterres, hateten Governu sei aprezenta rezultadu konferénsia Asia People Forum (APF) iha enkontru Rejionál entre Governu Asosiasaun Nasaun Sudeste Aziatiku (ASEAN) iha outubru 2024.
Notísia Relevante: Konferénsia APF atu kontribui dame iha Timor-Leste
Enkontru ativista Asosiasaun Nasaun Sudeste Aziatiku nian ne’e importante tebes ba Governu atu bele hadi’a serbisu públiku sira ba interrese populasaun nian.
“Ha’u sei aprezenta rezultadu konferénsia ne’e ba enkontru internasionál. Sosiedade sivil parte ida husi Governu nian ne’ebé halo diskusaun kona-ba ba asuntu Estadu nian hodi ajuda Governu serbí Estadu ida-ne’e di’ak-liu. Ha’u hanoin rekomendasaun sira-ne’ebé ita-boot sira fó ne’e di’ak, ami espera bele ajuda ami, bainhira Vise Primeiru-Ministru ba partisipa enkontru Summer Regional ne’e bele sei hato’o hanoin sira-ne’e ba iha Governu kada nasaun, atu nune’e kada Governu bele hala’o sira nia serbisu ho di’ak,” Ministru Interiór, Francisco da Costa Guterres, hateten iha nia diskursu, iha serimónia enseramentu konferénsia APF, iha salaun Eskola Téknika Vokasionál Becora.
Govrenante sujere ba reprezentante sosiedade sivil hotu husi nasaun seluk iha ASEAN atu kontinua organiza APF no Timor-Leste mós kontinua partisipa hodi bele dezenvolve aan no kontribui ba iha sosiedae nia moris.
Iha fatin hanesan, Xefe Komisaun Organizadora Nasionál na Konferénsia Sosiedade Sivil ASEAN, Elisabeth Lino de Araújo, hateten konferénsia APF ne’e la’o di’ak tebe-tebes ho susesu liuhusi partisipasaun membru sira hotu nian durante loron tolu (19-21 setembru) hodi diskute asuntu importante sira iha forum ne’e.
“Iha forun ne’e promove no ezerse espasu nakloke, ema ba ema, diskusaun iha baze hodi halo sinerjia kona-ba prátika alternativa no halo estratejia kona-ba advokasia, kampaña, harii moveimentu no rezisténsia iha nivel nasionál no rejionál, hametin movimentu povu sira-nian ajenda no ezijénsia, solidariedae rejionál no poder povu nian ba luta ida hodi reziste rejime esplorativu no opresivu no ikus liu mak hametin instituisaun APF,” Elisabeth Lino de Araújo, hato’o ba jornalista sira liuhusi konferénsia imprensa.
Iha konferénsia APF nian ne’e membru ativista sira husi ASEAN fó importánsia ba asuntu sira balun ne’ebé sei rekomenda ba iha kada Governu orijen hodi bele hadi’a iha nivel rejionál.
“Rekomendasaun sira mak hanesan hatuur loos demokrasia no liberdade kada povu nian, fó espasu ba ema hotu no Governu tenke rona di’ak nia povu, laiha rejime militár ka presaun militár no protesaun ba traballadór sira,” nia hateten.
Konferénsia APF husi sosiedade sivil iha ASEAN ba tinan 2025 sei organiza ka nasaun Malázia sei sai uma na’in ba iha sorumutu ne’e.
Notísia Relevante: Konferénsia APF atu kontribui dame iha Timor-Leste
Jornalista : Jesuína Xavier
Editór : Cancio Ximenes
