DILI, 25 setembru 2024 (TATOLI)–Xefe Departamentu Saniamentu iha Auotoridade Munisipál Dili (AMD), Domingos dos Santos Soriano, hateten, AMD hasai ona sirkulár ba instituisaun Estadu hotu-hotu atu halo limpeza tuir mapeamentu ne’ebé hasai husi Ministériu Administrasaun Estatál liuhusi AMD.
Iha sirkulár ne’ebé AMD fó sai no distribui ba instituisaun Estadu sira hakerek “Autoridade Munisipál Dili bolu ita hotu atu transforma sidade Dili sai fatin ne’ebé Hakmatek, Moos, Furak no sai fatin di’ak ba ema hotu”.
Nia esplika, sirkulár ne’e kada ministériu implementa ona molok amu Papa mai no depoizde amu Papa fila hanesan iha semana kotuk, AMD ba halo observasaun iha implementasaun ba sirkulár ne’e iha dadeersan durante oras tolu husi tuku 07h00 to’o tuku 10h00.
“Iha sesta-ferai kada semana tenke halo limpeza jerál. Tanba AMD distribui ba kada instituisaun kona-ba mapeamentu ba limpeza ba durasaun tinan ida. Kada instituisaun ami tau hotu área limpeza ezemplu Ministériu Saúde halo limpeza husi Motael to’o ponte Habibie,” Xefe Departamentu Saneamentu iha Auotoridade Munisipal Dili (AMD), Domingos dos Santos Soriano, hateten ba Agência Tatoli, iha Matadoru.
Iha sirkulár ne’e hateten ona katak iha kada sesta-feira ministériu sira orienta nia funsionáriu sira hodi halo limpeza tuir mapeamentu no oras determinadu.
Nia dehan, iha instituisaun Estadu balun seidauk implementa sirkulár ne’e hodi halo limpeza ba área sira-ne’ebé determina ona ba sira.
AMD distribui mapeamentu hanesan Ministériu sira Agrikultura, Floresta, Pekuária no Peskas, Obra Públika, Komersiu no Industria no Prezidensia no Konsellu Ministru ho nia instituisaun sub-tutela no UNITAL ne’e halo limpeza iha Cristo Rei no Dolok Oan.
Ministériu sira hanesan Asuntu Ekonómiku no Turizmu no Ambiente ho instituisaun sub-tutela halo limpeza iha área Jardín BJ Habibie to’o fatuk Bandeira.
Ministériu Finansa ho instituisaun sub-tutela no Defeza no Seguransa hahú husi Motael to’o Embaixada Malázia nian ne’e, iha loja Seara nia oin.
Ministériu sira hanesan Saúde, Defeza, Asuntu Kombatente Libertasaun Nasionál no Transporte Komunikasaun, Solidariedade Sosiál no Inkluzaun, Juventude Desportu, Arte no Kultura, AMD no Unicersidade da Paz no UNDILi, halo limpeza hahú husi igreja Motael to’o jardin Prezidente BJ Habibie.
Ministériu sira hanesan Negósiu Estranjeiru no Koperasaun, Petróleu no Rekursu Minerál, halo limpeza hahú husi Pertaminan Internasionál to’o mota ain Comoro no iha distribuisaun ba iha ministériu sira seluk no fatin seluk tan.
Presiza sensibiliza no fó sansaun ba populasaun viola lei
Diretór Ezekutivu HAK, Feliciano de Araújo husu ba Governu atu aplika sansaun ba populasaun ne’ebé soe lixu arbiru iha kapitál.
“Ita laiha sansaun ida klaru, tanba ema soe aqua arbiru, politika zero plastiku la funsiona, too iha ne’ebé, tenke sensibiliza no regra sira-ne’e ho forte,” nia dehan.
Molok implementa ne’e, nia dehan, Governu presiza halo sensibilizasaun ba lei sira-ne’ebé Governu halo ona ba populasaun, hodi hatene lalaok kona-ba lei ne’e tanba lei labele hakerek iha surat-tahan leten de’it.
Tuir nia, kaixote lixu ne’ebé AMD tau iha fatin-lixu sira iha komunidade nia le’et ne’e kiik, tanba populasaun prodús lixu barak liu kaixote sira-ne’e, no fatin koloka lixeiru mós seidauk adekuadu.
Jornalista : Jesuína Xavier
Editór : Cancio Ximenes
