DILI, 25 setembru 2024 (TATOLI)–Diretór Ezekutivu HAK, Feliciano de Araújo, hateten bee hanesan nesesidade bazika ba ema hotu atu garante bein-estar ema hotu nian no bele kontribui ba iha saúde públika iha Timor-Leste.
Objetivu Dezenvolvimentu sustentável 2011-2030 hakarak atinje katak ema hotu asesu ba iha bee, tanba ne’e mak ema hotu liuliu populasaun sira presiza asesu bee-moos.
“Ida-ne’e kontinua sai preokupasaun ba ami no sai direitu fundamentál. Deklarasaun universál hateten bee nu’udar direitu umanu,” Diretór Ezekutivu HAK, Feliciano de Araújo, hateten iha nia diskursu iha seminariu Dialogu nasionál esforsu ba planeamentu investimentu no advokasia ne’ebé intergradu ba melloramentu sistema bee no saneamenteu no ijene.
Nia hateten, Governu presiza tau konsiderasaun ba iha asuntu ida-ne’e sai, tanba povu hakarak bein estar no ba jerasaun sira
Vise-Primeiru-Ministru, Mariano Asanami Sabino, hateten importante mak halo jestaun, utlizasaun bee ho responsabilidade atu povu mós bele sente sentidu pertense.
Timor-Leste iha nesesidade atu dezenvolve bee, tanba ne’e nu’udar rekursu importante atu bele kuda iha foho leten no ai-horis hodi hamoris ka konserva fali bee-matan iha rai okos.
“Bee mak moris, bee ajuda ekonomia bele la’o. Importante mak kuidadu ai-horis sira mak hamoris bee-matan,” nia hateten.
Governante ne’e hateten, importante liu mak Governu sei servisu hamutuk ho Organizasaun Permacultura atu dezenvolve bee foho leten hodi hamoris bee-matan iha raí okos.
Iha fatin hanesan, Diretór Ezekutivu Water Aid, Justino da Silva, relata populasaun globál iha ema ida (1) entre ema na’in-10 la asesu ba bee-moos.
Dirijente ne’e mós relata millaun $1.6 iha mundu mak seidauk asesu ba iha saneamentu báziku, tanba bee la susfisiente atu responde.
Ih Timor-Leste, populasaun husi munisipiu neen (6) mak deklara ona katak livre husi soe foer arbiru (ALFA).
Iha Timor-Leste, 79% husi totál uma kain iha Timor-Leste seidauk hatoman aan hodi fase liman antes atu halo atividade hamoos modo, han no hemu bee.
Jornalista : Jesuína Xavier
Editór : Cancio Ximenes
