DILI, 26 setembru 2024 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, hateten Governu lihusi SEKOMS prepara hela rekursu umanu hodi kria plataforma Sistema Diseminasaun Integradu (SDI) hodi fó sai informasaun kona-ba atividade liña ministeriál sira-nian.
“Objetivu formasaun ba media officer sira-ne’e tanba sira serbisu iha ministériu sira, liuliu avansa teknolójia agora, Governu hakarak kria plataforma dijitál ida espesiál ba iha Governu Konstitusionál da-sia (IX), liuliu ami bolu plataforma SDI. Entaun, SEKOMS hamutuk ho TIC Timor ami serbisu hamutuk, atu ami bele kria plataforma dijitál ne’e katak informasaun ne’ebé rekolla no prodús husi media officer sira no mídia kovensionál. SDI ne’e mak sei fó sai atividade Governu Konstitusionál da-sia (IX) ein jerál ba públiku,” Sekretáriu Estadu Komunikasaun Sosiál, Expedito Dias Ximenes, ba jornalista sira, iha Pantai Kelapa.
Governante ne’e konsidera mídia iha papél imortante tebe-tebes, oras ne’e daudaun ba prosesu konstrusaun Estadu, tanba mídia mak pilár ba demokrasia, hanesan heteten iha 40 no 41 KRDTL.
Nia esplika, sidadaun iha direitu atu asesu ba informasaun kredivél, konfiavél, loloos no saudável, tanba ne’e mak portál Governu iha pajina Governu nianian liuhusi pltaforma ne’ebé Governu Konstitusionál da-sia (IX) kria.
“Iha avansu teknolojia ne’e, sé mak iha telefone Android bele, maibé bele desinformasaun ka fake news, entaun ita kria pájina atu fó informasaun,” nia dehan.
Mídia kada ministériu ne’e nomeasaun polítika, entaun Governu ida-nia mandatu ramata, sira-nia mídia mós sai, entaun laiha konservasaun informasaun.
Tuir nia, ba oin ne’e media officer sira iha instituisaun Estadu sira-ne’e tenke funsionáriu permanente atu iha baze informasaun ne’e iha ona no atu kontinua informasaun ne’ebé mak iha ona.
“Governu nafatin, troka mak membru Governu, Estadu ida de’it. SEKOMS sei propoen ba Konsellu Ministru hodi hili funsionáriu permanente sai media officer. Governu tenke konfia ema-ne’ebé iha, konfia ne’e loos, maibé ita haree husi perspetiva informasaun. Dalabarak membru Governu ida sai, nia mós sai no dadus informasaun ministériu mós lakon. Ida foun mai fali tenke prodús foun fali. Entaun, defisil uitoan. Ne’ebé, ba oin, presiza hili funsionáriu permanente,” nia dehan.
Iha fatin hanesan, Prezidente Konsellu Imprensa (KI), Otelio Ote, hateten, mídia iha plataforma ne’ebé oioin ne’ebé eziste, tenke liuhusi prosesu hodi prienxe kritériu hanesan lisensa ba publikasaun.
“Tenke rejistu iha Servisu Rejistu no Verifikasaun Empresariál hodi hetan lisensa no lori ba rejistu tan iha Konsellu Imprensa. Mídia ne’ebé hetan lisensa tenke publika loro-loron iha sira nia sítiu,” nia dehan.
Prezidente ne’e hateten, plataforma mídia ne’ebé hanesan Televizaun no Rádiu no jornál ne’ebé rejistu iha Facebook no You Tube, maibé laiha publikasaun loro-loron maibé uza de’it Facebook ne’e konsidera la’ós meiu komunikasaun sosiál.
Jornalista : Jesuína Xavier
Editór : Cancio Ximenes
