Tribunál akuza ajente PNTL envolve krime korrupasaun pasiva no atu ilísitu

DILI, 01 outubru 2024 (TATOLI) – Tribunál Judisiál Primeira Instánsia Dili (TJPID), tersa (01/10), ohin, halo julgamentu ba ajente Polísia Nasionál Timor-Leste (PNTL) ho inisiál AS ho deviza ajente prinsipál tanba akuzadu hanesan arguidu ba krime korrupasaun pasiva ho aktu ilísitu ne’ebé previstu iha artigu 192 Kóndigu Penál Timor-Leste.
Tuir akuzasaun hosi Ministériu Públiku katak arguidu AS nudar ajente PNTL ne’ebé kolokadu iha Komandu PNTL Munisípiu Liquiça hanesan forsa rezerva ka taskforce.
Iha setembru 2023, iha sidadaun na’in-lima ho kamioneta tula mina rai husi Suku Sanerin, Postu Administrativu Balibo, Munisípiu Bobonaro atu mai faan iha Dili. Maibé to’o iha Munisípiu Liquiça, kamioneta referida hetan apreensaun husi Komandu PNTL Liquiça.
Arguidu AS mak momentu ne’e halo apreensaun ba kamioneta ne’e no iha prosesu apreensaun ne’e arguidu AS la hatudu profisionalizmu hanesan membru PNTL, tanba momentu ne’ebá arguidu bolu tiha ema sira ne’ebé iha kamioneta laran hodi hateten, sé imi hakarak lori sasan ne’e liu ba Dili, entaun tenke fó osan $200 mak imi foin liu, sé lae imi la liu.
Ho nune’e, na’in ba minarai ne’e fó de’it osan $100 ba arguidu AS, hafoin husik arguidu kamioneta ne’e liu mai Dili no arguidu ho nia motór liu tiha diresaun Maubara nian.
Bainhira kamioneta ne’e to’o iha area Tibar, ekipa Autoridade Aduaneira (Alfándega) ne’ebé kolokadu iha Portu Tibar halo kedan apreensaun ba kamioneta ne’e, tanba ekipa Alfándega simu informasaun katak iha karreta ida husi fronteira hatama minarai ilegál mai Dili.
Ekipa Alfándega haruka kamioneta ne’e ba fali Komandu PNTL Munisípiu Liquiça atu polísia halo tiha inspensaun ba sasan sira iha karreta laran molok lori sasan sira ne’e ba Dili.
Haree ba hahalok arguidu AS nia ne’e, Ministériu Públiku akuza arguidu ho krime korrupasaun pasiva ho aktu ilísitu ne’ebé previstu iha artigu 192.
Durante julgamentu, arguidu AS hili direitu nonok no lakohi fó nia depomentu hodi hatan ba akuzasaun husi Ministériu Públiku nian ne’ebé Juiz lee sai iha sala julgamentu laran.
“Ha’u hili direitu nonok no lakohi buat ruma”, arguidu AS dehan iha sala julgamentu Tribunál Judisiál Primeira Instánsia Dili, tersa, ohin.
Hafoin rona tiha deklarasaun husi arguidu, Ministériu Públiku ne’ebé reprezenta husi Prokuradór Matias Soares solisita ba Tribunál atu notifika hodi bolu sasin ne’ebé envolve iha prosesu ne’e.
Tribunál liuhusi Juiz Ivan Suritai aseita no sei notifika sasin sira ne’ebé envolve iha prosesu ne’e atu rona sira-nia deklarasaun.
Bainhira Tribunál rona tiha parte hotu, Tribunál marka fali julgamentu ne’e iha loron 22 fulan-Outubru 2024, tuku 16:00 hodi kontinua rona sasin sira seluk ne’ebé envolve prosesu ne’e.
Jornalista: Natalino Costa
Editór : Zezito Silva

