Covalima hein desizaun hodi implementa Lei Podér Lokál-Desentralizasaun Administrativa
COVALIMA, 07 Outubru 2024 (TATOLI) – Autoridade Munisipál Covalima hein desizaun husi Ministériu Administrasaun Estatál (MAE) atu implementa Lei Podér Lokál no Desentralizasaun Administrativa.
Prezidente Interinu Autoridade Munisipál Covalima, Alberto Moniz de Araújo, dehan Prezidente Repúblika promulga ona lei ne’e, maibé presiza atu halo sensibilizasaun ba autoridade sira.
“Daudaun ne’e, autoridade Covalima seidauk simu orientasaun husi MAE, maibé bainhira simu ona orientasaun ami prontu atu ezekuta”, Alberto Moniz de Araújo dehan iha AMC, ohin.
Nia dehan munisípiu sira prienxe ona rekizitu, tanba iha ona kondisaun mínima nune’e iha posibilidade iha 2026, Covalima bele implementa ona, maibé depende ba avaliasaun.
Autoridade Covalima nia preparasaun rekursu ba implementasaun Lei Podér Lokál no Desentralizasaun Administrativa sufisiente ona, tanba tuir polítika Governu nian funsionáriu Covalima-oan ne’ebé servisu iha nasionál sei destaka fali bá iha Covalima atu dezenvolve nia munisípiu.
Atu implementa Lei Podér Lokál no Desentralizasaun Administrativa presiza prepara kondisaun hanesan hadi’a edifísiu, prepara rekursu adekuadu no Governu sentrál mós halo ona lansamentu ba balkaun úniku.
Nune’e, Lei Podér Lokál no Desentralizasaun Administrativa konstrui ho pesoál koletiva, iha territóriu nasionál ba órgaun reprezentativu sira-ne’ebé define organizasaun kompeténsia ba funsionamentu no kompozisaun ne’ebé define iha lei.
Lei Podér Lokál atu hakbesik servisu públiku sira husi Estadu ba iha kraik ka atribui kompeténsia tomak ba munisípiu tomak hodi halo planu no programa no halo nia orsamentu rasik.
Aleinde ne’e, Lei Desentralizasaun Administrativa atu Governu sentrál halo transferénsia kompeténsia atu fó podér ba munisípiu sira hodi atribui kompeténsia ne’ebé durante ne’e seidauk fó ba munisipál.
Notísia relevante: MAE fó prioridade ba desentralizasaun administrativa-podér lokál iha OJE 2024
Jornalista: Celestina Teles
Editora: Maria Auxiliadora
