DILI, 18 outubru 2024 (TATOLI)–Xefe Polisia Vulneravel Person Unit (VPU), Ricardo da Costa, informa iha fulan tolu ikus ne’e VPU rejista kazu krime hanesan violénsia doméstika no abuzu seksuál hamutuk 315.
“Husi jullu to’o setembru, ita iha kazu violénsia domestika hamutuk 277 no ita prosesu ba iha Ministériu Públiku. Ita mós rejista kazu violasaun seksuál iha fulan tolu ne’e nian hamutuk kazu 38. Entaun, totál kazu krime ne’e hamutuk 315,” Xefe Polisia Vulneravel Person Unit (VPU), Ricardo da Costa, relata iha nia intervensaun iha enkontru entre rede referál husi sosiedade sivil ho Sekretária Estadu Igualdade no Inkluzaun, iha Caicoli.
Iha tolu anterior, nia dehan, VPU rejista kazu hamutuk 340 ho tipu violénsia domestika no abuzu seksuál, maibé iha mudansa uitoan mak iha fulan tolu ikus ne’e redús tiha ba kazu 25, tanba iha sensibilizasaun husi parte hotu-hotu ba sosiedade kona-ba krime sira-ne’e.
Xefe VPU ne’e hateten, husi totál kazu ne’ebé aprezenta iha enkontru ne’e dadus husi violénsia no abuzu seksuál husi teritoriu nasionál.
“Dadus sira-ne’e ita hetan, tanba ami iha sistema ida online ne’ebé ita bele haree kazu sira-ne’e,” nia dehan.
Ricardo da Costa hateten, iha satisfasaun ba atendimentu kazu sira-ne’e tanba Ministériu Justisa liuliu notariadu no igreja bele fasilita sira ho dokumentu sira hodi prosesa kazu.
“Ita halo pedidu ida ba iha ne’ebá, sira bele fó vitima sira-nia dokumentu sira. Iha kazu balun haensan menór sira-ne’ebé seidauk iha sertidaun sarani ka sivil, bainhira hetan violasaun ruma,” nia dehan.
Iha mos balun, nia hateten, sarani ona maibé seidauk foti sira-nia sertidaun, entaun difikulta iha prosesu ba atendimentu kazu violasaun krime ruma ba menór sira.
Jornalista : Jesuína Xavier
Editór : Cancio Ximenes
