Top

Janeiru-setembru: PNTL rejista kazu asidente tráfegu 1.733 no mate 90

Motor Honda Beat ne’ebé rahun total iha asidente tráfegu ne’ebé akontese iha area kruzamentu One Dollar Beach, Suku Fatumeta, Postu Administrativu Laclo, Munisípiu Manatuto, sábadu (20/06/2020). Imajen/Foti husi Facebook

DILI, 24 outubru 2024 (TATOLI)–Unidade Polísia Tránzitu husi Polísia Nasionál Timor-Leste (PNTL), husi janeiru to’o setembru, rejista kazu asidente tráfegu hamutuk 1.733 iha territóriu no husi totál ne’e ema-ne’ebé mate hamutuk 90.

Husi ema na’in-90 ne’ebé mate ne’e, nia dehan, inklui ema-ne’ebé hemu tua mak lori karreta no motorizada ne’e hamutuk ema na’in-12.

“Polísia tránzitu iha atividade sensibilizasaun liuliu ligadu dadus ba kazu asidente ne’ebé ita haree katak dadus ne’ebé ita rekolla iha ita-nia territóriu ne’e hahú husi janeiru to’o setembru hamutuk 1733, ema na’in-90 lakon vida,” Xefe Departamentu Tránzitu no Seguransa Rodoviáriu iha PNTL, Superintendente Asistente Polísia Luís Costa, hateten ba jornalista sira, iha semináriu ho tema “Hadomi Vida Prevene Alkool”, parseria ho empreza Heineken, iha Comoro.

Nia hateten, PNTL serbisu ho kompañia Heneiken hakarak informa ba estudante sira katak ema konsumu tua la kuidadu hodi kondús viatura no motorizada, entaun bele lakon vida no kanek todan no kmaan.

Komadante ne’e hateten, infrasaun ne’ebé iha ne’e kuaze ema joven sira mak envolve, entaun relasiona ho semináriu ne’e foinsa’e no estudante sira bele transmite fila-fali ba familia no kolega sira hodi prevene konsumu tua bainhira kondús karreta ka motirizada.

Tuir nia, problema ne’ebé mosu ne’e dala barak kauza husi ema hemu tua, tanba foinsa’e sira la hemu iha fatin propriu hanesan iha uma, ema hemu atu halakon kole husi serbisu, maibé hemu fatin públiku sira, la’o ba ne’ebé de’it hemu tua.

Iha fatin hanesan, Jerente empreza Heineken iha Timor-Leste, Pisey Houng, hateten semináriu hala’o hakarak prevene asidente ne’ebé kauza husi tua no bele fó impaktu ba ema-nia vida.

“Estatéjia kompañia ninian ami la’ós promove de’it maibé halo no promosaun ba serveja de’it, maibé ami promove atu prevene ka hemu ho moderasaun katak labele hemu barak liu atu labele fó impaktu ba ita-nia saúde no bainhira hemu labele lori karreta no motorizada atu prevene asidente,” nia hateten.

Jornalista : Jesuína Xavier

Editór       : Cancio Ximenes

Publisidade

Leave a Reply

Latest Post

error: Content is protected !!