DILI, 25 outubru 2024 (TATOLI)–Jerente Kompañia Seroka Unipesoál, Lda, Domingos Helio, hateten empreza sei kuda fali duut no ai-funan sira-ne’ebé mate iha jardín sira hanesan jardin 12 Novembru Motael, Palásiu Governu nia oin, 05 5 de Maio, Babadok, no jardin Largo de Lecidere.
“Ai-funan balun mate rasik no balun fukit husi komunidade ne’ebé laiha konsiénsia. Maibé kompañia kaer ne’e iha responsabilidade. Balun mate ne’e ami kuda fila-fali ona hanesan iha jardin Palásiu Governu nia oin ne’e,” Nia hateten ba Agência TATOLI, sesta ne’e.
Nia dehan, ai-funan balun tahan maran maibé ninia hun ne sei iha entaun iha posibilidade moris, tan ne’e sei hein bainhira mate totá ona mak empreza sei kuda fila fali.
“Ita kontinua rega, se labele liu, ita fukit sai hafoin kuda fila-fali foun,” nia dehan.
Nia esplika pesoál husi kompañia rega loro-loron jardín sira ho bee tanke de’it, tanba bee ne’ebé kanaliza husi empreza reabilitasaun sira-ne’e ema sobu hotu inklui lampu sira-ne’ebé monta iha ne’ebá.
“Bee sira iha jardín ne’e la funsiona, tanba momentu reabilitasaun hotu ne’e la kria seguransa no sasán sira-ne’e ema halo aat tiha. Ema halo fera torneira no mangera fera hotu. Bomba eletrisidade ba bee-moos ema fokit sai hotu, la hatene sé, maibé ami identifika ona,” nia dehan.
Nia relata, kompañia foin hadi’a fila fali bomba bee iha jardin 12 Novembru Moatel nian ne’e no sei hadi’a liña eletrisidade no sei hadi’a iha jardin sira seluk.
“Kompañia prontu hadi’a, maibé sei halo negosiasaun ho Governu iha konkordánsia ruma atu hadi’a atu bele minstériu turismu bele aloka fila-fali osan ba gastu sira husi empreza,” nia hateten.
Tanba, bainhira obra foun tenke iha aseitasaun no aprovasaun ruma ministériu relevante ba akordu ruma.
Jornalista : Jesuína Xavier
Editór : Cancio Ximenes
