NINGBO, 30 outobru (TATOLI)- Jornalista na’in-21 ne’ebé partisipa Iha seminar midia profisional nasaun ASEAN 2024 ne’ebé halo iha Ningbo Xina kuarta (30/10) kontinua ba halo vizita Portu Ningbo no Empreza boot iha Xina ho naran Safewell.
Objetivu husi vizita ne’e atu hatene ezisténsia no servisu funsionamentu Portu Ningbo durante ne’e.
Profesór Cai Mingdong, hateten, Portu Ningbo nu’udar Portu Ida ne’ebé boot iha provinsia Zhejiang ne’ebé lokaliza iha sidade Ningbo.
” Portu Ida ne’e hetan vizita ona husi Prezidente Xi Jimping, Portu Ida-ne’e nu’udar Portu ne’ebé ho padraun internasionál ne’ebé kompleta ho fasilidade sofistifikadu. Tinan Ida hatama reseita ba Estadu billaun 4.2 RMB”, Cai Mingdong hateten ba jornalista bainhira vizita Portu Ningbo iha, kuarta horseik.
Portu Ningbo ka Portu Chuanshan, iha terminál kontentór, fulan ida simu kontentor 50.000 bele to’o 60.000.
“Portu nee simu sasan importansaun Huai Sanhai, Brazil, Amérika inklui nasaun sira husi Illa pasifiku,” nia haktuir.
Enkuantu funaionáriu sira ne’ebé servisu iha Portu nee hamutuk.4.000 sira nia saláriu kada fulan 10.0000 RMB.
Hafoin vizita Portu Profesór Cai Mingdong lori jornalista 21 ba museum Portu Chuanshan Ningbo hodi haree no hatene prosesu harii portu Ningbo iha tempu imperiu to’o mai ohin loron ho Nia dezenvolvimentu sai Portu ne’ebé modernu no kualidade ho fasilidade ne’ebé kompletu sira ne’ebé Portu Ningbo iha kapital Ningbo provinsia Zhejiang.
Iha biban ne’e mós, jornalista na’in-21 kontinua vizita empreza Safewell.
Empreza Safewell nu’udar empreza ne’ebé boot iha Xina lokalizada iha Ningbo. Empreza referida fa’an brankas ne’ebé atu asegura osan no dokumentu importante sira. Brankas ne’ebé empreza ne’e fa’an husi medida ki’ik to’o boot no brakas ne’ebé empreza ne’e faan ho kualidade di’ak.
Empreza Safewell daudaun ne’e extende ona nia ramu negósiu iha Singapura, Vietname, Singapura, Indonézia, França no Alemaña.
Xefe Ezekutivu Empreza Safewell, Xu Punan, iha nia intervensaun hateten, empreza Safewell iha prinsípiu haat no prinsípiu haat ida mak sai hanesan matadalan ba hodi Safewell metin to’o ohin loron.
Nia dehan, atu halo empreza ida susesu ninia xave importante mak na’in ba empreza ka dirrijente empreza tenke respeita ninia taballadór, tenke iha transparansia ba ba malu no tenke iha espiritu onestidade.
“Atu susesu iha negósiu ida rmpreza tenke valoriza no respeita ninia funaionáriu sira, tenke fiar malu bainhira halo servisu, tenke transparansia ba malu no tenke onestu ba malu. Espiritu onestidade ne’e importante inklui fó atendimentu ne’ebé diak ba ita kliente. Ita-nia atendimentu ne’e ita-nia kliente tenke sente seguru no satisfas buat sira ne’e hola parte iha susesu iha negosiu”, nia akresenta.
Xu Punan, reitera, durante ezisténsia Safewell iha Ningbo halo atividade karitativa no durante nee Safewell tulun ona ema barak.
“Ami mós durante ne’e halo asaun karidade hodi fo tulun ba maluk sira ne’ebé presiza ita-nia tulun”, nia konklui.
Jornalista: Natalino Costa
Editór: Rafael Ximenes de A. Belo
