DILI, 04 novembru 2024 (TATOLI)–Xefe Departamentu Servisu Saneamentu iha Autoridade Munisipíu Dili (AMD), Domingos dos Santos Soriano, hateten Governu liuhusi AMD iha planu atu kuda fali ai-funan foun hodi troka ai-funan sira-ne’ebé mate iha estrada Delta ba Elemloi.
“Ami agora tau hela osan ida atu sosa hanesan ai-funan surat-tahan, modelu sira hanesan ne’e, ami planu hela. Maibé, ami mak seidauk hetan empreza atu fornese ba ami,” xefe departamentu ne’e hateten ba Agência TATOLI, segunda ne’e.
Bainhira hetan ona empreza balun antes novembru nia rohan, mak sei kuda fali ai-funan foun hodi troka ai-funan sira mate ne’e, tanba Governu iha ona planu maibé ai-funan mak la hanesan ida mate tiha ona ne’e hodi kuda fali ai-funan seluk.
Nia hateten ai-funan sira ne’ebé agora mate ne’e empreza sira uluk foti ka sosa husi rai-li’ur, nune’e sei buka meiu atu hetan ai-funan sira seluk ne’ebé iha.
“Ami buka meu ida atu troka ai-funan ida-ne’e, agora ida mate ne’e ema halo viveiru maibé presiza osan. Kuda naran ai ida, ne’e ita iha maibé ita presiza tau ka kuda ai-funan di’ak iha jardin públiku sira-ne’e ai-oan ne’ebé di’ak hanesan daudaun sira kuda iha Tasi-Tolu no tesik ba Comoro nian,” nia esplika.
A-funan sira-ne’e mak Governu hakarak kuda foun fali maibé folin karun uitoan, entau to’o agora Governu seidauk bele kuda fali ai-funa foun maibé iha ona esforsu atu kuda foun.
“Agora, ami seidauk bele troka ai-funan sira ne’e, maibé ami esforsu atu troka. Ai-funan hanesan pucuk merah ne’e di’ak, maibé ami AMD seidauk tau osan ba iha ne’ebá,” nia dehan.
Responsavel ne’e esplika, kauza husi ai-funan mate ne’e tanba bailoron no lorn manas makaas, tanba ne’e mak ai-funan sira la konsege moris.
“Ita rega loron rua dala ida, entaun ai-funan la tahan manas. Fatin kuda ai-funan iha Estrada nia klaran ne’e naruk loos, tanba ne’e mak rega loron rua rega dala ida atu bele perkore ka kobre rega jardin seluk iha Díli laran ne’e,” nia hateten.
Xefe departamentu ne’e hateten, AMD iha jardin lubuk ida-ne’ebé tenke rega loro-loron, maibé sira mate tanba la auguenta loron manas.
Jornalista : Jesuína Xavier
Editór : Cancio Ximenes
