DILI, 05 novembru 2024 (TATOLI)–Ministériu Agrikultura, Pekuária, Peska no Floresta (MAPPF) liuhusi Unidade Kuarentena no Bioseguransa rejista importasaun ai-funan husi Bali-Kupang-Indonézia hamutuk futun 6.447 no kaixa 126 liuhusi kuarentena.
Diretór Unidade Kuarentena no Bioseguransa, Manuel da Costa, hateten ema importa ai-funan sira-ne’e liuhusi fatin rua iha loron 30 outubru no 01 novembru 2024, ho tipu ai-funan oioin mai Timor-Leste hanesan Mawar, Krisan, Pikok, Ruskus, Leader Leaf no Gompi.
“Ai-funan ne’ebé importa ne’e ai-funan ida-ne’ebé fresku tuir lei karantina nian, tanba uluk sirkular sai tiha ona katak ai-funan ne’ebé hetan autorizasaun ba importasaun (impor permit),” Diretór Unidade Kuarentena no Biosiguransa, Manuel da Costa, hateten ba Agência TATOLI, iha Aeroportu Internasionál Prezidente Nicolau Lobato, Comoro, tersa ne’e.
Responsável ne’e hateten, iha loron finadu semana kotuk entre ai-funan ne’e iha uitoan de’it mak hetan apreensaun husi kuarentena ba empreza importadora sira, tanba ai-funan sira hetan estragu.
“Iha ai-funan dos rua mak ai-funan dodok ona ne’ebé sira hetan no balun futun, maibé ita la sura,” nia relata.
Parte Kuarentena simu rejistu ba ai-funan importasaun husi empreza sira hamutuk 50kg ba iha loron finadu nian. ai-funan sira-ne’e importa husi Bali-Indonézia no Kupang-Indonézia.
Empreza ne’ebé hatama ai-funan ba negósiu nian iha rejistu Servisu Rejistu no Verifikasaun Emprezariál (SERVER).
Nia sujere ba sidadaun sira, katak Timor-Leste prodús ona ai-funan iha Aileu no Maubisse, maibé empreza importadora sira mai prienxe rekezitu aplikasaun kuarentena nian, tanba ne’e mak nia husu ba ema hotu sei importa ai-funan uitoan de’it, di’ak-liu ne’e sosa iha rai-laran.
Ai-funan sira-ne’ebé tama la tuir autorizasaun lei kuarentena bele hetan apreensaun hodi sunu, se la’e hetan penalti ka multa ho valór entre $1000 to’o $5.000 ba produtu hanesan ai-funan sira ne’ebé la iha kualidade.
“Importante liu mak ai-funan sira tama mai ne’e iha kualidade. Bainhira ai-funan tama mai laiha kualidade hanesan namlaek, maske iha sertifikadu ita foti ka halo apreensaun sunu hotu,” nia hateten.
Bainhira sira iha foer ka buat balun ne’ebé la loos, sira deteta iha aeroportu liuhusi sistema inspesaun no halo destruisaun.
Jornalista : Jesuína Xavier
Editór : Cancio Ximenes
