DILI, 08 novembru 2024 (TATOLI) – Primeiru-Ministru, Kay Rala Xanana Gusmão, iha debate ba Orsamentu Jerál Estadu (OJE) 2025 iha Parlamentu Nasionál, faze jeneralidade husu ba membru Governu hotu atu kontinua hala’o servisu ho másimu iha tinan 2025 hodi serbí povu.
Iha debate ba proposta OJE 2025 iha Parlamentu Nasionál iha faze Jeneralidade hetan aprovasaun ho ho votu afavór 42, abstensaun 22 no kontra 0.
“Loos, deputadu sira husu mai Governu atu hala’o servisu ho másimu, ba membru Governu hotu, ita tenke buka atu servisu ho di’ak, ami husu ba deputadu sira hotu liuliu PD ho CNRT tenke monitoriza, reforsa fiskalizasaun ba implementasaun OJE 2025 nian. Husu mós ba opozisaun fó mós imi nia kontribuisaun atu iha saida mak di’ak ba povu nian ita hotu tenke hamutuk, ita hamutuk la’os atu halo projetu, maibé hamutuk iha monitorizasaun no fiskalizasaun,” PM Xanana hateten iha nia intervensaun ikus diskusaun OJE 2025 iha faze jeneralidade, sesta ne’e.
Tuir Xefe Governu katak atu kontrola Governu nia servisu di’ak liu kada fulan Parlamentu Nasionál tenke bolu Governu atu responde iha uma-fukun ne’e kona-ba progresu servisu ne’ebé atinje ona.
“Ami dehan katak, retorika ne’ebé ami tau iha proposta OJE 2025, ami hatu’ur ona nu’udar realidade ne’ebé loke dalan neneik hanesan ko’alia kona-ba diversifikasaun ekonomika buat sira ne’e hotu labele sai retorika ba mehi boot ida de’it, iha ne’e ami iha programa ba tinan lima, se ami hatene mehi de’it mak tinan lima mai povu hili fali partidu seluk tanba ami la konsege halo buat ruma,” tenik PM Xanana
Nune’e, Primeiru-Ministru hato’o agradesementu ba kritika hotu ne’ebé bankada opozisaun halo hasoru Governu tanba atu fanun Governu halo servisu di’ak liutan.
“Deputadu sira hosi opozisaun, ha’u agradese tebes ba ita-boot sira nia kritika sira hotu atu fó hanoin mai ami atu hadi’a nafatin ami nia kbi’it ezekusaun di’ak liu ba povu,” Xanana hateten perante ba deputadu 65 iha Parlamentu.
Xefe Governu ne’e rekonese durante tinan ida resin Governu dasia iha duni kolapsu balun maibé ho hanoin ne’ebé fó hosi opozisaun hanesan kontribuisaun atu hadi’a.
“Deputadu sira balu dehan iha kolapsu iha Governasaun ida ne’e, ami simu hotu de’it. Karik durante tinan lima ne’e ami la kumpri ami nia promesa povu mak sei hili fali partidu seluk atu halo di’ak liu,” Xanana tenik.
Tuir nia, deklarasaun hotu ne’ebé bankada opozisaun hato’o durante debate OJE 2025 iha Parlamentu Nasionál pozitivu tebes atu Governu simu hodi hala’o servisu másimu liu iha tinan 2025.
Deputadu Mandati Louva Maturidade PM Xanana
Iha okaziaun ne’e, Deputadu bankada FRETILIN, David Dias Ximenes Mandati agradese ba Primeiru-Ministru, Kay Rala Xanana Gusmão ne’ebé hakraik aan hodi simu kritika hotu ne’ebé opozisaun sira levanta.
“Maun Xanana, obrigadu, ita-boot durante loron tolu nia laran debate orsamentu ne’e kalma tebes, ita la hanesan uluk, bainhira rona kritika sira ita nervozu, maibé ita agora diferensa tebes, mantein hanesan ne’e ba oin atu ita hamutuk hadi’a rai ida ne’e,” Mandati tenik.
Nia dehan tan, “ha’u kontente tanba ita-boot Xanana hanesan nafatin Xanana ida uluk, kontinua nafatin hanesan ne’e atu halo jestaun di’ak iha ita nia Governasaun oinsa atu hakat ba oin, ita diferensa polítika nafatin maibé ita labele sai fali inimigu ba malu.”
Entretantu proposta-lei númeru 12/VI (2a)-OJE 2025 ho monante billaun $2,6 prienxe rekezitu formál hodi bele halo apresiasaun iha plenária faze jeneralidade.
Tuir guiaun ba diskusaun no votasaun iha jeneralidade hala’o durante loron tolu (3) hahú husi 06-08 novembru tinan ne’e.
Tuir Rejimentu Parlamentu Nasionál (RPN) iha artigu 105.º (Inísiu diskusaun), iha númeru 1 hateten diskusaun iha jeneralidade foka ba prinsípiu no sistema projetu ka proposta lei ida-idak nian.
Enkuantu, tuir ajenda iha loron 11-25 novembru 2024, sei kontinua halo diskusaun ba proposta-lei OJE 2025 iha faze espesialidade.
Tuir guiaun ne’ebé iha, diskusaun no votasaun iha espesialidade hahú iha kada artigu, númeru ou alinea, no iha tabela orsamentál ho nia anexu iha proposta-lei OJE 2025, no bainhira iha proposta alterasaun mak sei halo uluk diskusaun no votasaun.
Ba proposta alterasaun aprezenta to’o finál diskusaun no votasaun iha jeneralidade, ne’ebé ho nia giaun no presiza kumpre rekezitu ne’ebé iha, nune’e hodi orienta meza iha serbisu diskusaun no votasaun proposta alterasaun ne’ebé admitidu.
Iha proposta-lei númeru 12/VI(2a) Orsamentu Jerál Estadu (OJE) 2025 hahú husi nia Expozisaun Motivu, no nia iha artigu hamutuk sia (9), ne’ebé hahú husi Kapítulu I Dispozisaun Inisiál, artigu 1 Objetu no ámbitu, Kapítulu II Orsamentu Jerál Estadu, artigu 2 Aprovasaun tabela orsamentál, artigu 3 Impostu, taxa no kontribuisaun, artigu 4 Transferénsia Fundu Petrolífeiru, artigu 5 Dívida Públika, artigu 6 Garantia, artigu 7 Transferénsia entre sub-setór.
Kapítulu III Orsamentu Seguransa Sosiál, artigu 8 Transferénsia saldu Seguransa Sosiál, Kapítulu IV Dispozisaun Finál, artigu 9 Entrada em vigór no produsaun efeitu.
Tuir RPN iha artigu 109.º (Diskusaun), iha alinea 1 hateten diskusaun iha espesialidade foka ba artigu ida-idak, la taka dalan ba buat ne’ebé previstu iha númeru tuir mai, no alinea 2 mós haktuir katak sei laiha diskusaun iha espesialidade ba artigu ida se la aprezenta proposta alterasaun ruma kona-ba artigu ne’e.
Nune’e, bainhira ramata diskusaun ba proposta-lei OJE 2025 iha faze espesialidade mak kontinua kedas votasaun iha finál globál.
Tuir ajenda, iha 26 novembru 2024, halo aprovasaun iha finál globál no iha 27 novembru 2024 ne’e komisaun C halo redasaun finál ba dekretu PN ne’ebé aprova OJE 2025, hafoin haruka ba Prezidente Repúblika (PR) mak iha kompeténsia eskluziva atu promulga.
Enkuantu, iha 01 outubru 2024, Governu liuhusi Ministra Finansa (MF), Santina Cardoso, aprezenta proposta-lei OJE 2025 ho montante billaun $2,6 ba PN ne’ebé simu direta husi Prezidente Parlamentu Nasionál, Maria Fernanda Lay.
Nune’e, liuhusi reuniaun plenária iha 07 outubru 2024, meza PN anúnsiu no baixa proposta-lei OJE 2025 ba komisaun C ho komisaun permanente sira seluk hodi bele elabora prosesu tuir mai.
Iha loron 16-17 outubru 2024, PN liuhusi komisaun C realiza seminária Panorama Orsamentál 2025.
Iha loron 18-28 outubru 2024, komisaun permanente sira halo audiénsia públika ba proposta-lei OJE 2025, hodi konvida liña ministerial sira no entidade públiku sira hodi mai aprezenta relatóriu ezekusaun OJE 2024 no hato’o planu orsamentu 2025 nian.
Notisia relevante: PN aprova proposta OJE 2025 iha faze jeneralidade ho votu afavór 42
Jornalista: Hortencio Sanchez
Editor: Florencio Miranda Ximenes
